ޖެނިފާއަށް މޯލްޑިވިއަންގެ ޑީއެމްޑީކަން ދީ، ބަދަލު ނަގައިދޭން އަންގައިފި

އައިލެންޑް އޭޭވިއޭޝަން (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރުގެ މަޤާމުގައި ހުންނެވި އާއިޝަތު ޖެނިފާ މަޤާމުން ވަކިކުރީ ޤާނޫނާ ޚިލާފަށް ކަމަށް ކަނޑައަޅައި ވަޒީފާ އަނބުރާ ދިނުމާ، ލިބުނު މާލީ ގެއްލުމުގެ ބަދަލު ދިނުމަށް ވަޒީފާއާ ބެހޭ ޓްރައިބިއުނަލުން އައިއޭއެސްއަށް އަންގައިފިއެވެ.

ވަޒީފާއާ ބެހޭ ޓްރައިބިއުނަލުން ބުނެފައިވަނީ ޖެނިފާ ވަޒީފާއިން ވަކި ކޮށްފައި ވަނީ، މުވައްޒަފަކު ވަޒީފާއިން ވަކި ކުރުމަށް ހުއްދަ ކުރާފަދަ ހާލަތެއް މެދުވެރިވެގެން ކަމަށް ބުރަނުވެވޭތީ، އޭނާ ވަޒީފާއިން ވަކިކޮށްފައި ވަނީ ޤާނޫނާ ޚިލާފަށް ކަމަށެވެ.

އަދި އޭނާ އަދާކުރަމުންދިޔަ މަޤާމު އަނބުރާ ދިނުމަށާއި ޖެނީފާއަކީ ވަޒީފާއިން ވަކި ވެފައިވާ ފަރާތެއް ކަމަށް ނުބެލުމަށާއި ވަޒީފާއިން ވަކިކުރި ތާރީހުން ފެށިގެން ވަޒީފާއާބެހޭ ޓްރައިބިއުނަލުން މައްސަލަ ނިންމުމާ ހަމައަށް ހޭދަވި މުއްދަތަށް ޖެނީފާ ވަޒީފާގައި ދެމިހުރި ނަމަ ހައްގުވާނެ މުސާރަ އާއި އިނާޔަތްތައް ނަގައިދިނުމަށެވެ. އައިއޭއެސްގެ ޑީއެމްޑީގެ މަޤާމުގެ މުސާރައިގެ ގޮތުގައި ޖެނިފާއަށް މަހަކު 34،304ރ ލިބިވަޑައިގެންނެވިއިރު، އެ މަޤާމުގެ އެހެން އިނާޔަތްތަކުގެ ގޮތުގައި 21،000ރ އަށްވުރެ ބޮޑު އަދަދެއް އޭނާއަށް ލިބެއެވެ.

ވަޒީފާ އިން ވަކިކުރީ ޤަވާޢިދާ ހިލާފަށް ކަމަށް ކަނޑައަޅައިދިނުމާ އެކު ބަދަލު ނަގައިދިނުމަށް އެދި ޖެނީފާގެ ފަރާތުން ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅުއްވީ މިދިޔަ މާރިޗު މަހު އެވެ. އެގޮތުން ޓްރައިބިއުނަލްއަށް ޖެނިފާ ހުށަހަޅާފައިވަނީ ޖެނިފާ މަގާމުން ވަކިކުރުމަށް 28 ޑިސެމްބަރު 2023ގައި އައިއޭއެސްގެ ބޯޑުން ނިންމި ނިންމުމަކީ ބާތިލް ނިންމުމެއް ކަމަށް ކަނޑައަޅައިދިނުމަށާއި އޭނާ މަގާމުން ވަކިކުރަން ނިންމައި އެންގި އެންގުމާއި ވަޒީފާ އިން ވަކިކުރިކަން އަންގައި ދިން ޗިޓަކީ ބާތިލް އެއްޗެއް ކަމަށް ކަނޑައަޅައިދިނުމަށެވެ. މީގެ އިތުރުންވެސް ވަޒީފާއާއި ގުޅޭ ގިނަ ކަންތައްތަކެއް ހިމަނާފާއިވާއިރު، ވަޒީފާ އިން ވަކިކުރުމުން ލިބުނު މާލީ ގެއްލުމުގެ ބަދަލުގައި ތިން މަހުގެ މުސާރަ ނަގައިދިނުމަށާއި، ޓްރައިބިއުނަލަށް މައްސަލަ ހުށަހެޅުމަށް ޤާނޫނީ ވަކީލުން އައްޔަންކުރުމާއި މައްސަލަ ކުރިއަށް ގެންދަން ހޭދަވި ޚަރަދު އައިއޭއެސް އިން ނަގައިދިނުމަށް ހުށަހަޅާފައިވެއެވެ.

އެމްޑީޕީގެ އެކްޓިވިސްޓެއް ކަމަށްވާ އައިޝަތު ޖެނިފާ ޑެޕިއުޓީ މެނޭޖިން ޑިރެކްޓަރަކަށް އައްޔަން ކުރީ ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައެވެ. އޭނާ އެމަޤާމުން ވަކިކުރީ މިއަހަރުގެ ޖަނަވަރީ މަހުގެތެރޭގަ އެވެ.