ރައީސްގެ ވަޢުދުފުޅާ އެއްގޮތަށް ފާޓިލިޓި ސެންޓަރު ތަރައްޤީކޮށް، ކުޑަ ދުވަސްކޮޅެއް ތެރޭގައި ޚިދުމަތް ދޭން ފަށާނެ- ސީއީއޯ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ފާޓިލިޓި ސެންޓަރު ތަރައްޤީކޮށް، ކުޑަ ދުވަސްކޮޅެއްގެ ތެރޭގައި ޚިދުމަތް ދޭން ފަށާނެ ކަމަށް މާލެ ހޮސްޕިޓަލްސް ގްރޫޕްގެ ސީއީއޯ އިބްރާހިމް އަބްދުއްރައްޒާގް ހަލީމް ވިދާޅުވެއްޖެއެވެ. 

މާލެ ހޮސްޕިޓަލްސް ގްރޫޕުން ބޭއްވި ނިއުސް ކޮންފަރެންސްގައި، ސީއީއޯ އިބްރާހިމް ވިދާޅުވީ މިހާރު ޤާއިމްކުރާ ނޭޝަނަލް ފާޓިލިޓީ ސެންޓަރަކީ ނަން ބޯޑެއް ނޫންކަމަށާއި މި ސެންޓަރަކީ އައިވީއެފް ހެދޭނެ ގޮތަށް ބޭނުންވާ ހުރިހާ ވަސީލަތްތަކާއެކީގައި ޤާއިމްކުރާ ފާޓިލިޓި ސެންޓަރެއް ކަމުގައެވެ.

ދަރުމަވަންތައިގެ ޑެޕިއުޓީ ސީއީއޯ ޑރ. ޝާހު މާހިރު ވިދާޅުވީ ބޭނުންވަނީ އެހެން ހޮސްޕިޓަލްތަކާ ގުޅިގެން ކުރާ މަސައްކަތްތައް ވީހާ ވެސް މަދުކޮށް، އަމިއްލަ ފައި މައްޗަށް ތެދުވެފައިވާ ސެންޓަރެއް ޤާއިމް ކުރުމަށް ކަމަށެވެ. 

ޝާހު އިތުރަށް  ވިދާޅުވީ އެދެވޭ ގޮތެއްގައި މިހާތަނަށް ފާޓިލިޓީ ޚިދުމަތް ފުޅާކުރުމުގެ މަސައްކަތް ނުކުރެވޭ ކަމަށާއި އަމިއްލަ މަރުކަޒެއް ހެދުމުން  ދަރިމައިވުމުގެ ފަރުވާއަށް ބޮޑު ކުރިއެރުމެއް ލިބޭނެ ކަމަށެވެ.

ރާއްޖޭގައި އައިވީއެފްގެ ޚިދުމަތް ދެމުން ގެންްދަނީ ހަމައެކަނި ޓްރީޓޮޕް ހޮސްޕިޓަލްގައެވެ. ސަރުކާރުން ވަނީ އާސަންދައިގެ ދަށުން އައިވީއެފް ހެދުމަށް ފުރުސަތު ދޭން ނިންމާފައެވެ. މިއީ ރައީސް ޑރ މުޙައްމަދު މުއިއްޒުގެ ރިޔާސީ ވަޢުދުފުޅެކެވެ. އެގޮތުން ޝަރުތު ހަމަވާ 37 މީހަކު ކަނޑައަޅައި އެހީ ދިނުމަށް ވަނީ ނިންމައިފި އެވެ.