ރައީސް ނަޝީދަށް ދިން ހަމަލާގެ މައްސަލަ: ވަކީލުން ހާޒިރުނުވެ މިއަދު ޝަރީޢަތް ކުރިއަށްނުގެންދެވުނު!

ކުރީގެ ރައީސް މުޙައްމަދު ނަޝީދަށް 2021 ވަަނަ އަހަރުގެ މެއި 6 ވަނަ ދުވަހު ދިން ހަމަލާގެ މައްސަލަގެ މިއަދުގެ ޝަރީޢަތުގެ މަޖިލިސް ވަކީލުން ހާޒިރުނުވުމުގެ ސަބަބުން ކެންސަލް ކޮށްފިއެވެ. 

މިއަދުގެ ޝަރީޢަތުގެ މަޖިލިސް ތާވަލު ކުރެވުނީ ދައުލަތުގެ ހެކިންގެ ހެކިބަސް ނެގުމަށެވެ. 

މި އަޑުއެހުން ފައްޓަވަމުން މައްސަލަ ބައްލަވާ ގާޒީ ސޮފްއަތު ޙަބީބް ވިދާޅުވީ މި މައްސަލާގައި ހިމެނޭ އަލީ ހައިޝަމުގެ ވަކީލު ބަލިވެ އުޅޭތީ އަޑުއެހުމަށް ހާޒިރުވެވެން ނެތްކަން ސިޓީއަކުން އަންގާފައިވާ ކަމަށެވެ. އަދި ހާޒިރު ނުވެވޭ ސަބަބެއްގެ ގޮތުގައި އެ ސިޓީގައި ބުނެފައިވަނީ، ހައިޝަމްއާއި ބައްދަލު ނުވުމާއި ފަޔަށް އަނިޔާއެއްވުމުގެ އިތުރުން ބަލިވެއުޅުން ކަަމަށް ސޮފްވަތު ވިދާޅުވިއެވެ.

ނަމަވެސް ހައިޝަމްގެ ވަކީލުގެ އެ ސަބަބުތައް ޤަބޫލު ކުރެވެން ނެތްކަން ފާހަގަކުރައްވައި ގާޒީ ސޮފްއަތު ވިދާޅުވީ، ވަކީލު ހުށަހަޅާފައިވާ މެޑިކަލް ސެޓިފިކެޓަކީ ކޯޓުގެ ބޭނުމަށް ބޭނުންކުރެވޭނެ ލިއުމެއް ނޫން ކަމަށް އޭގައި ލިޔެފައިވާނެކަމަށެވެ.

މީގެ ކުރިންވެސް މައްސަލައިގެ ޝަރީއަތް ކެންސަލް ކުރަންޖެހުނީ އެހެން ދިފާޢީ ވަކީލެއް ހާޒިރު ނުވެގެންކަން ފާހަގަކުރައްވައި ގާޒީ ވިދާޅުވީ އެފަދައިން ޝައީޢަތުގެ އަޑުއެހުން ކެންސަލް ކުރަންޖެހޭ ނަމަ މައްސަލަ ކުރިއަށް ނުދާނެ ކަމަށެވެ.

އެއާއެކު ގާޒީ ވަނީ ވަކީލުގެ ސަބަބު ޤަބޫލު ކުރެވެން ނެތް ކަމަށް ނިންމައި ޝަރީއަތް ކުރިއަށް ގެންދަވަން ފައްޓަވާފައެވެ. ނަމަވެސް، ޝަރީއަތް ގެންދަން ބޭނުންވަނީ ވަކީލަކާ އެކުކަމަށް ހައިޝަމް ބުނުމުން ދައުލަތުންވެސް ވަނީ ހައިޝަމްގެ ފަރާތުން އެގޮތަށް އެދިފައި ވަނިކޮށް ވަކީލަކާ ނުލައި ހެކިބަސް ނެގުން ކުރިއަށް ގެންދަން އިއުތިރާޒްކޮށްފަ އެވެ.

އެހެންކަމުން ގާޒީ ވަނީ މިއަދުގެ ޝަރީއަތް ނިންމަވާލައްވާފައެވެ. އަދި މިގޮތައް ޝަރީއަތުގެ މަޖިލިސް ނިންމައިލަން ޖެހުމުން ގާޒީ ވަނީ ނުރުންފާޅުކުރައްވައިފައެވެ.