ވައްކަން ކުރަން ޓްރާންސްފޯމަރެއްގެ ތެރެއަށް ވަދެ އިން މީހަކު ހައްޔަރުކޮށްފި

ހުޅުމާލޭ ފޭސް 2 ގައި ކަރަންޓު ދިނުމަށް ބޭނުންކުރާ ޓްރާންސްފޯމަރެއްގެ ތެރެއަށް ވަދެ އިން މީހަކު ހައްޔަރުކޮށްފި އެވެ.

ފުލުހުން ވިދާޅުވީ، ޓްރާންސްފޯމަރެއް ތެރެއަށް ވައްކަން ކުރަން މީހަކު ވަދެ އުޅުނު ކަމަށް ފުލުހުންނަށް ރިޕޯޓްކޮށްފައި ވަނީ މިއަދު ފަތިހު 5:30 ހާއިރު ކަމަށެވެ. މި މައްސަލައިގައި 32 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށްވެސް ފުލުހުން ވިދާޅުވިއެވެ. ފުލުހުން ހައްޔަރު ކޮށްފައިވަނީ ނ.މާޅެންދޫ، ފެހި އައްސޭރި އަހުމަދު ރިޝްފާން ކިޔާ ދިވެއްސެކެވެ.

ސޯޝަލްމީޑިއާގައި ދައުރުވަމުންދާ ވީޑިއޯއިމް ފެންނަ ގޮތުގައި، ސްޓެލްކޯގެ މުވައްޒަފުންނާއި ފުލުހުން ޓްރާންސްފޯމަރު ކައިރިއަށްގޮސް ދޮރު ހުޅުވަން މަސައްކަތް ކުރާއިރު އެމީހާ އިންނަނީ ޓްރާންސްފޯމަރު ތެރޭ، އެތެރެއިން ދޮރުގައި ހިފަހައްޓައިގެންނެވެ. އެމީހާ ނެރެފައިވަނީ ގަދަކަމުން ދޮރު ހުޅުވުމަށް ފަހުގައެވެ.

މިއަހަރުގެ މާރިޗު މަހުގެ ތެރޭގައި ހުޅުމާލޭގެ ދެވަނަ ފިޔަވަހީގެ ހުރި ޓްރާންސްފޯމަރަކުން ވައްކަން ކުރަން އުޅުނު މީހަކު ކަރަންޓުގައި ޖެހިގެން ނިޔާވެފައިވެއެވެ.