އީސީ އަދި އޭސީސީ ރައީސްއާއި ނާއިބު ރައީސްވެސް ރައީސުލްޖުމްހޫރިއްޔާއަށް އައްޔަނުކުރެވޭ ގޮތަށް އިސްލާހެއް !

އިލެކްޝަންސް ކޮމިޝަންއާއި (އީސީ) އެންޓި ކަރަޕްޝަން ކޮމިޝަން (އޭސީސީ)ގެ ރައީސްއާއި ނާއިބު ރައީސްވެސް ރައީސުލްޖުމްހޫރިއްޔާއަށް އައްޔަނުކުރެވޭ ގޮތަށް އިލެކްޝަންސް ކޮމިޝަންގެ ޤާނޫނާއި އެންޓި ކޮރަޕްޝަން ކޮމިޝަންގެ ޤާނޫނަށް އިސްލާހު ގެންނަން ދެ ބިލު ރައްޔިތުންގެ މަޖީލިހަށް ހުށަހަޅައިފި އެވެ.

އޭސީސީގެ ޤާނޫނަށް އިސްލާހު ގެނައުމުގެ ބިލް ސަރުކާރުގެ ފަރާތުން ހުށަހެޅުއްވީ ފެލިދޫ ދާއިރާގެ ޕީއެންސީގެ މެންބަރު އާދަމް ޒާހިރެވެ. އީސީގެ ޤާނޫނަށް އިސްލާހު ހުށަހެޅުއްވީ ކެލާ ދާއިރާގެ ޕީއެންސީގެ މެންބަރު އަބްދުﷲ ޝަރީފެވެ. ސަރުކާރުގެ ފަރާތުން ހުށަހެޅި އެ ދެ ބިލު ރައްޔިތުންގެ މަޖިލީހުގެ މާދަމާގެ ޖަލްސާގައި ފުރަތަމަ ކިޔުން އިއްވުމަށް ވެސް ވަނީ ހަމަޖެހިފަ އެވެ.

މި ދެ އިދާރާގެވެސް ޤާނޫނު މިހާރު ބުނާ ގޮތުން، އެ ކޮމިޝަންތަކުގެ ރައީސާއި ނައިބު ރައީސް އައްޔަން ކުރާނީ، ކޮމިޝަންގެ ޖަލްސާގައި މެމްބަރުގެ ތެރޭގައި ނަގާ ވޯޓަކުންނެވެ. ނަމަވެސް އެ ދެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ މާއްދާ އަށް ހުށަހަޅާފައިވާ އިސްލާހާއެކު ކޮމިޝަންގެ މެމްބަރުންގެ ތެރެއިން ކޮމިޝަނުގެ ރައީސަކާއި ނައިބު ރައީސް  އައްޔަން ކުރައްވާނީ ރައީސުލްޖުމްހޫރިއްޔާއެވެ. މުސްތަގިއްލު ކޮމިޝަންތަކުގެ ހިންގުން ހަރުދަނާކޮށް، އެ ކޮމިޝަންތަކުގެ ރައީސާއި ނައިބު ރައީސްގެ މަގާމަށް މެމްބަރުން އައްޔަން ކުރުމުގެ އުސޫލު އެއްހަމަކުރުމުގެ ގޮތުން ހުށަހެޅި އިސްލާހެއް ކަމަށް ބުނެފައިވެއެވެ.

އިސްލާހުގައިވާ ގޮތުން ދެ ކޮމިޝަނުގެ ރައީސް އަދި ނައިބު ރައީސްގެ މަޤާމަށް އައްޔަން ކުރާ މީހެއްގެ ނަން މަޖިލީހަށް ހުށަހަޅަން ޖެހޭނެއެެވެ. އަދި ހަމައެއާއެކު ކޮމިޝަނުގެ ރައީސާއި ނައިބު ރައީސް އައްޔަން ކުރެވޭނީ، މަޖިލީހުގެ ޖަލްސާ އަށް ހާޒިރުވެ، އެކަމަށް ނަގާ ވޯޓެއްގައި ބައިވެރިވެވަޑައިގަންނަވާ މެމްބަރުންގެ އަޣުލަބިއްޔަތުން ފާސްވުމުން ކަމަށްވެސް އެ އިސްލާހުތަކުގައިވެ އެވެ.