މިސްކިތްތަކުން ވައްކަން ކުރުން ހައްދުން ނައްޓާފަ

މިސްކިތްތަކުން ވައްކަން ކުރުން ހައްދު ފަހަނަޅައި ގޮސް އީދު މިސްކިތް މަރާމާތަށް ބަންދުކޮށްފައި ވަނިކޮށް ވެސް ވައްކަން ކޮށްފިއެވެ. 

މާލޭ ސިޓީ ކައުންސިލުން ބުނީ، މިސްކިތް ބަންދު ކޮށްފައިވަނިކޮށް ވައްކަން ކޮށްފައިވަނީ ރޭ އިރުއޮއްސި 06:00 އާއި 10:00 އާ ދޭތެރޭގައި ކަމަށެވެ. މި ފަހަރު ވަގަށް ނެގާފައިވަނީ 13 ބޮތްކާއި 8 ފަންކާގެ ނަރުތައް  ކަމަށް ސިޓީ ކައުންސިލުން ބުނެފައިވެއެވެ. ސިޓީ ކައުންސިލުން މިހާރު ވަނީ މި މައްސަލަ ފުލުހަށް ހުށަހަޅައިފައި އެވެ.

މީގެ ކުރިން ވެސް އެތައް ފަހަރެއްގެ މަތިން  އީދު މިސްކިތުން ވައްކަން ކުރާ މައްސަލަތައް ވަނީ ފެންމަތިވެފައި ވެއެވެ. އީދު މިސްކިތް ނޫނަސް މާލޭގެ ގިނަ މިސްކިތްތަކުން ވައްކަން ކުރުން ވަނީ އިތުރުވެފައެވެ. 

މިކަމާ ސިޓީ ކައުންސިލުން ކަންބޮޑުވުން ފާޅުކޮށްފައިވާއިރު ފުލުހުން ދަނީ މިކަން ކުރާ މީހުންގެ މަޢުލޫމާތުތައް އާންމުކޮށް ވީޑިއޯވެސް އާންމު ކުރަމުންނެވެ. މިސްކިތްތަކުގައި ކެމެރާ ހަރުކޮށްފައި ހުރިނަމަވެސް ވައްކަން ކުރުމުގެ މައްސަލައަށް ހުއްޓުމެއް އައިސްފައެއް ނުވެއެވެ.