ސިނގިރޭޓު އެތެރެކުރުމުގަ ކުންފުނީގެ ބައިވެރިވުމެއް ނެތް، ތުހުމަތު ކުރެވޭ މުވައްޒަފުން މަސައްކަތުން އެކަހެރިކޮށްފިން- ހޯކްސް

ވަގަށް ސިނގިރޭޓު އެތެރެކުރުމުގައި ކުންފުނީގެ ބައިވެރިވުމެއް ނެތް ކަމަށާއި، ތުހުމަތު ކުރެވޭ މުވައްޒަފުން މަސައްކަތުން އެކަހެރި ކޮށްފައިވާކަމަށް "ދަ ހޯކްސް" ކުންފުނިން ބުނެފިއެވެ.

 ފުޅާ ދާއިރާއެއްގައި ތެޔޮ އެތެރެކޮށް ވިއްކާ ހޯކްސް ކުންފުނީގެ ތެޔޮ ބޯޓު "އެމްޓީ ހޯކްސް ޖަވާހިރު"ން ގިނަ އަދަދަކަށް ސިނގިރޭޓް އެތެރެކުރަން އުޅޭ ކަމުގެ މައުލޫމާތު މިދިޔަ ހުކުރު ދުވަހުގެ ރޭ ލިބުމުން ހިންގި ހާއްސަ އޮޕަރޭޝަންގައި، ވަގަށް އެތެރެކުރި 8،000 އަށް ވުރެ ގިނަ ސިނގިރޭޓް ކާޓަންގެ ޝިޕްމަންޓް ކަަސްޓަމްސް އިން ވަނީ އަތުލައިގަނެފަ އެވެ.

ކަސްޓަމްސްއިން ބުނެފައިވަނީ މިހާތަނަށް 'ހޯކްސް ބޯޓްޔާޑް' ބަލައިފާސްކުރުމުން، އެ ތަނުގައި ހުރި އެކޮމަޑޭޝަނުންނާއި ވޯކްޝޮޕުން މެންޗެސްޓާ ބްރޭންޑުގެ ސިނގިރޭޓުފެނިފައިވާކަމަށެވެ.  އަދި މި ސިނގިރޭޓްތައް މިހާރު ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.

މިކަމާ ގުޅިގެން ހޯކްސްއިން ބުނީ ރާއްޖެއަށް ވަގަށް އެތެރެކުރި ސިނގިރޭޓްތަކެއް ދަ ހޯކްސް ކުންފުނީގެ ބޯޓަކުން ފެނުނު ނަމަވެސް އެކަމުގައި ކުންފުނީގެ ބައިވެރިވުމެއް ނެތް ކަމަށާއި އެކަން ކުރީ މުވައްޒަފުންތަކެއް އެ މީހުންގެ އަމިއްލަ މަންފާއަށް ކަމުގައެވެ. މިހާރު އެ މުވައްޒަފުންނާ މެދު ފިޔަވަޅު އަޅާފައިވާ ކަމަށް ވެސް ހޯކްސްއިން ބުނެފައިވެއެވެ.

ހޯކްސްއިން ނެރުނު ބަޔާނުގައި ބުުނެފައިވަނީ އެކުންފުންޏަކީ ދެފުށްފެންނަ ގޮތަށް ވިޔަފާރި ކުރަމުންއަންނަ ކުންފުންޏެއް ކަމަށެވެ. އަދި މިފަދަ ކަންކަމާއި ގުޅިގެން ޒިންމާ ނަގަންޖެހޭ ފަރާތްތަށް ހޯދުމަށް ކުރަންޖެހޭ އެންމެހާ ކަންތައްތައް ކުރުމަށް ގާނޫނު ތަންފީޒުކުރާ އިދާރާތަކަށް ދޭންޖެހޭ ފުރިހަމަ އެއްބާރުލުން ދަ ހޯކްސްއިން ދޭނެކަމުގެ ފުރިހަމަ ޔަގީންކަން އަރުވާކަމަށެވެ. 

އެކުންފުނިން ބުނީ ކުންފުނީގެ އިދާރީ ތަހުގީގެއް ފަށާފައިވާ ކަމަށާއި ކުންފުނީގެ މުވައްޒަފުންތަކެއްގެ މައްޗަށް ގައިރު ގާނޫނީ ހަރަކާތްތަކަކަށް ކުންފުނީގެ ވަސީލަތްތައް ބޭނުންކޮށް އަމިއްލަ މަންފާ ނަގަން މަސައްކަތްކޮށްފައިވާކަމުގެ ތުހުމަތުކުރެވިފައިވާކަމަށެވެ. އެހެންކަމުން ކުންފުނިން ވަނީ ތުހުމަތު ކުރެވުނު މުވައްޒަފުންތައް ވަގުތުން މަސައްކަތުން އެކަހެރިކޮށް، ކަމާބެހޭ ތަހުގީގީ އިދާރާތަކަށް އެކަން ރިޕޯޓްކޮށްފައި ކަމުގައި ހޯކްސްއިން ބުނެއެވެ.