މިހާރު މަޖިލީހުގައިވާ ބިލުގައިހުރި ނޫސްވެރިންގެ ކަންބޮޑުވުންތައްވެސް ރައީސް ހައްލުކޮށްދެއްވާނެކަން ޔަޤީން: ވަޒީރު ޝިޔާމް

މިހާރު މަޖިލީހަށް ހުށަހަޅާފައިވާ މީޑީއާ ރެގިއުލޭޓް ބިލުގައިހުރި ނޫސްވެރިންގެ ކަންބޮޑުވުންތައްވެސް ރައީސް ޑރ. މުޙައްމަދު މުޢިއްޒު ހައްލުކޮށްދެއްވާނެކަމުގެ ޔަޤީންކަން އެބަ އޮތްކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ކޮމިޓީ މަރުހަލާގައި މިހާާރު އޮތް ބިލާ ގުޅޭގޮތުން އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަކީ، ނޫސްވެރިންގެ ގޮންޖެހުންތައް ރަނގަޅަށް ދެނެވަޑައިގަންނަވާ ރައީސެއް ކަމުގައެވެ. އަދި ރައީސް މުޢިއްޒަކީ އެގޮންޖެހުންތަކަށް ހައްލު ހޯއްދަވައިދެއްވުމަށް ޚާލިސް ނިޔަތަކާއެކު މަސައްކަތްކުރައްވާ ވެރިއެއް ކަމަށްވެސް ވަޒީރު ވިދާޅުވިއެވެ. ހަމައެއާއެކު މިހާރު މަޖިލީހުގައިވާ ބިލުގައިހުރި ނޫސްވެރިންގެ ކަންބޮޑުވުންތައްވެސް ހައްލުކޮށްދެއްވާނެކަން ޔަޤީންކަން އޮތްކަމަށް ވަޒީރު ވަނީ ވިދާޅުވެފައެވެ. 

ރައީސް @MMuizzu އަކީ ނޫސްވެރިންގެ ގޮންޖެހުންތައް ރަނގަޅަށް ދެނެވަޑައިގަންނަވާ އަދި އެގޮންޖެހުންތަކަށް ހައްލު ހޯއްދަވައިދެއްވުމަށް ޚާލިސް ނިޔަތަކާއެކު މަސައްކަތްކުރައްވާ ވެރިއެއް. މިހާރު މަޖިލީހުގައިވާ ބިލުގައިހުރި ނޫސްވެރިންގެ ކަންބޮޑުވުންތައްވެސް ހައްލުކޮށްދެއްވާނެކަން ޔަޤީން

— Ahmed Shiyam (@Shiyamaldives) September 12, 2025

ނޫސްވެރިކަން ރެގިއުލޭޓްކުރެވޭނެ ހަރުދަނާ ނިޒާމެއް ޤާއިމުކުރުމަށް، މިޑިއާތައް ރެގިއުލޭޓުކުރުމާ ގުޅޭ ބިލަށް ސަރުކާރުން ވަނީ އިސްލާހުތަކެއްވެސް ހުށަހަޅުއްވާފައެވެ. އަދި މި އިސްލާހު ތަކަކީ މީޑިއާއާއި އަދި އާންމު ރައްޔިތުންގެ ހައްޤުތައް ހިމާޔަތްކުރެވޭފަދަ ގޮތަކަށް ހުށަހަޅުއްވާފައިވާ އިސްލާހުތަކެއް ކަމަށް ބަންޑާރަނައިބު އަލްއުސްތާޛް އަޙުމަދު އުޝާމު މިއަދު ވަނީ ވިދާޅުވެފައެވެެ.