ގެދޮރުވެރިޔާ ފްލެޓް: މިހާތަނަށް 588 މީހަކު ސެކިއުރިޓީ ޑިޕޮސިޓާއި މެއިންޓަނެންސް ފީ ދައްކައިފި

ގެދޮރުވެރިޔާ ސްކީމްގެ ދަށުން ފްލެޓް ލިބޭ ފަރާތްތަކުގެ ތެރެއިން މިހާތަނަށް 588 މީހަކު ސެކިއުރިޓީ ޑިޕޮސިޓާއި މެއިންޓަނެންސް ފީ ދައްކާފައިވާކަމަށް ފަހި ދިރިއުޅުން ކޯޕަރޭޝަން، އެފްޑީސީ އިން ވިދާޅުވެއްޖެއެވެ.

ފަހި ދިރިއުޅުން ކޯޕަރޭޝަނުން ވިދާޅުވީ، މިހާތަނަށް ޖުމްލަ 588 މީހަކު ސެކިއުރިޓީ ޑިޕޮސިޓާއި މެއިންޓަނެންސް ފީ ދައްކާފައިވާއިރު، ޑިޕޮސިޓާއި މެއިންޓަނެންސް ފީ ދެއްކުމަށް 909 މީހުންނާއެކު ތާވަލުކުރެވިފައިވާ ކަމަށެވެ. ހަމަ އެހެންމެ، އެއްބަސްވުންތަކުގައި ސޮއިކޮށް، ޓަވަރުތައް ނިމިފައި ހުރި މިންވަރުން ޑިޕޮސިޓް ދައްކާފައިވާ ފަރާތްތަކަށް އެޕާޓްމަންޓުތަކުގެ ތަޅުދަނޑި ހަވާލުކުރުމުގެ މަސައްކަތް ވެސް ކުރިއަށްދާނެކަމަށް އެ ކޯޕަރޭޝަނުން ވަނީ ވިދާޅުވެފައެވެ.

ސަރުކާރުން ކަނޑައަޅުއްވާފައިވާ ގޮތުން، 2 ކޮޓަރީގެ އެޕާޓްމަންޓަކަށް 15,000ރ، އަދި 3 ކޮޓަރީގެ އެޕާޓްމަންޓަކަށް 25,000ރ ގެ ޑިޕޮސިޓެއް ދައްކަން ޖެހެއެވެ.  ނަމަވެސް، ސަރުކާރުން ވަނީ ޤަވާއިދުން ކުލި ދައްކާ ފަރާތްތަކަށް ބޮޑު ސަބްސިޑީއެއް ދިނުމަށް ނިންމާފައެވެ. އެގޮތުން، 2 ކޮޓަރީގެ އެޕާޓްމަންޓްގެ ކުލި 9,000ރ އިން 7,000ރ އަށް، އަދި 3 ކޮޓަރީގެ އެޕާޓްމަންޓްގެ ކުލި 13,000ރ އިން 9,000ރ އަށް ވަނީ ކުޑަކޮށްފައެވެ. ނަމަވެސް، މި ފައިސާ ދެއްކުމަށް ވަކި މުއްދަތެއް ކަނޑައަޅާފައެއް ނުވެއެވެ. ފްލެޓްތަކުގެ ތަޅުދަނޑި ހަވާލުކުރެވޭނީ އެއްބަސްވުމުގައި ސޮއިކުރުމަށްފަހު، ޔުޓިލިޓީ ޚިދުމަތްތަކަށް ރަޖިސްޓަރވެ، ޑިޕޮސިޓް ފައިސާ ދެއްކުމުންނެވެ.

އެފްޑީސީން އެންމެ ފަހުން ޢާންމުކޮށްފައިވާ ތަފާސްހިސާބުތަކުން ފެންނަ ގޮތުގައި، ސޮއިކުރުމަށް މިހާތަނަށް ތާވަލު ކުރެވުނު އެއްބަސްވުންތަކުގެ ޢަދަދަކީ 3131 އެވެ. އޭގެ ތެރެއިން، މިހާތަނަށް ސޮއިކުރެވުނު އެއްބަސްވުންތަކުގެ ޢަދަދު 3119 އަށް އަރާކަމަށް އެ ކޯޕަރޭޝަނުން މަޢުލޫމާތުދެއެވެ. އެހެންކަމުން، މިއީ އިޖްތިމާޢީ ބޯހިޔާވަހިކަން ފޯރުކޮށްދިނުމަށް އެ ކޯޕަރޭޝަނުން ކުރަމުންދާ މަސައްކަތްތަކުގެ ތެރެއިން ހާސިލުކުރެވުނު މުހިންމު އެއް ލަނޑުދަނޑި ކަމަށް އެފްޑީސީން ވިދާޅުވެއެވެ.

އެއްބަސްވުމުގައި ސޮއިކުރުމުގެ މަސައްކަތް ވަރަށް ހަލުވިކަމާއެކު ކުރިއަށްދާއިރު، ދުވާލެއްގެ މައްޗަށް އެއްބަސްވުންތަކުގައި ސޮއިކުރެވޭ މިންވަރު އިތުރު ކުރުމަކީ އެ ކޯޕަރޭޝަނުގެ އަމާޒެއް ކަމަށް އެފްޑީސީއިން ވަނީ ވިދާޅުވެފައެވެ.