ފާއިތުވީ ދެ މަހާ އަޅާބަލާއިރު މިދިޔަ މަހު ވަރި ބޮޑުތަނުން މަދު- ތަފާސްހިސާބު

ފާއިތުވީ ދެ މަހާ އަޅާބަލާއިރު މިދިޔަ މަހު ވަރީގެ މައްސަލަތައް ބޮޑުތަނުން މަދުވެފައިވާކަމަށް ފެމިލީ ކޯޓުގެ ތަފާސްހިސާބު ތަކުން ދައްކައިފިއެވެ. 

ފެެމެލީ ކޯޓުން އާންމުކޮށްފައިވާ ތަފާސްހިސާބުތައް ދައްކާ ގޮތުން ނިމިދިޔަ ސެޕްޓެމްބަރު މަހު ހުށަހަޅާފައިވަނީ 98 ވަރީގެ މައްސަަލައެވެ. އަދި  194 ކައިވެނި ކޮށްދީފައިވާކަމަށްވެސް ތަފާސް ހިސާބުތަކުން ދައްކައެވެ. މިއީ ފާއިތުވީ ޖުލައި އަދި އޮގަސްޓު މަހު ވަރިވެފައިވާ މީހުންނާ އަޅާ ބަލާއިރު ވަރަށް ބޮޑު ދަށްވުމެކެވެ. އެހެން ނަމަވެސް ކާވެނީގެ އަދަދު އޯގަސްޓް މަހަށްވުރެ ސެޕްޓެމްބަރު މަހުގައި ގިނައެވެ.

ތަފާސް ހިސާބުތައް ދައްކާގޮތުން ޖުލައި މަހުގައި 167 ވަރި ވެފައިވާއިރު، އޯގަސްޓު މަހުގައި ވަރިވެފައި ވަނީ 147 ވަރިއެވެ. އޭގެ ފަހުގައި ސެޕްޓެމްބަރު މަހުގައި ވަނީ 98 ވަރި ވެފައެވެ. މި ތިންމަހުގެ ކައިވެނީގެ ޢަދަދަށް ބަލާއިރު ތިންމަސް ތެރޭގައި އެންމެ ގިނަ ކައިވެރި ކޮށްފައިވަނީ ޖުލައި މަހުގައެވެ. އެމަހުގައި 228 ކައިވެނި ކޮށްފައިވާއިރު އޯގަސްޓު މަހުގައި އެ އަދަދު 186އަށް ވަނީ މަދުވެފައެވެ. އެއާއެކު ސެޕްޓެމްބަރު މަހުގައި އެ އަދަދު 194 އަށް ވަނީ މައްޗަށް ޖެހިލާފައެވެ. 

ފެމެލީ ކޯޓުން ސެޕްޓެމްބަރު މަހު ޖުމްލަ ވަރީގެ 138 މައްސަލައެއް ނިންމާފައެވެ. އޭގެ ތެރޭގައި ހިމެނެނީ ވަރިވުމަށް އެދި ހުށަހެޅުނު 67 މައްސަލައަކާއި ވަރިކުރަން އެދި ހުށަހެޅުނު 24 މައްސަލައަކާއި ވަރި ސާބިތުކުރުމަށް އެދި ހުށަހަޅާފައިވާ 43 މައްސަލައެއްގެ އިތުރުން ވަރިއާ މެދު ޝައްކު އުފެދުމުން ހުށަހެޅި 4 މައްސަލައެކެވެ.

ސެޕްޓެމްބަރު މަހުގައި ވަރި އަދި ކައިވެނީގެ އިތުރުން އާއިލީ 19 މައްސަލައަކާއި ކުޑަކުދިންނާ ގުޅުންހުރި 11 މައްސަލައަކާއި ޚަރަދުގެ 19 މައްސަލައްކާއި ގެވެށިއަނިޔާއާ ގުޅުންހުރި 11 މައްސަލައެއް ނިންމާފައެވެ. ވަރީގެ 138 މައްސަލައާ އެކު އެ ކޯޓުން ޖުމްލަ 198 މައްސަލައެއް ސެޕްޓެމްބަރު މަހުގައި ނިންމާފައިވެއެވެ.