ރައީސުލްޖުމްހޫރިއްޔާ، ތުރުކީވިލާތުގެ ޖުމްހޫރީ ދުވަހުގެ މުނާސަބަތުގައި އެ ޤައުމުގެ ރައީސަށް ތަހުނިޔާ ފޮނުއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތުރުކީވިލާތުގެ 101 ވަނަ ޖުމްހޫރީ ދުވަހުގެ މުނާސަބަތުގައި އެ ޤައުމުގެ ރައީސް ރަޖަބް ޠައްޔިބު އުރްދުޣާނަށް ތަހުނިޔާގެ މެސެޖެއް ފޮނުއްވައިފިއެވެ. މި މެސެޖުގައި ރައީސް މުޢިއްޒު ވަނީ ދެ ޤައުމުގެ ދެމެދުގައިވާ ވަރުގަދަ އަދި ބަދަހި ގުޅުމުގެ މައްޗަށް އަލިއަޅުވާލައްވާފައެވެ.

ރައީސުލްޖުމްހޫރިއްޔާގެ މެސެޖުގައި ފާހަގަކުރައްވާފައިވާ ގޮތުގައި، ދިވެހިރާއްޖެ އާއި ތުރުކީވިލާތުގެ ގުޅުމަކީ އެއް ޤައުމުން އަނެއް ޤައުމަށް ކުރާ އިތުބާރުގެ ބިންގާގެ މަތީގައި ބިނާކޮށްފައިވާ ގުޅުމެކެވެ. އަދި ދެ ޤައުމުގެ ދެމެދުގައި 45 އަހަރު ވެފައިވާ ޚާރިޖީ ގުޅުމުގެ މައްޗަށްވެސް އެމަނިކުފާނު ވަނީ އަލިއަޅުއްވާލައްވާފައެވެ.

މީގެއިތުރުން، ރައީސް މުޢިއްޒު ވިދާޅުވެފައިވަނީ ޖޯގްރަފީ ގޮތުން ދެ ޤައުމުގެ ދެމެދުގައިވާ ދުރުމިން ކިތަންމެ ބޮޑުކަމުގައި ވިޔަސް، ބައިލެޓަރަލް އަދި މަލްޓިލެޓަރަލް މަންސަތަކުގައި ދެ ޤައުމުގެ ދެމެދުގައިވާ ގުޅުން އިތުރަށް ފުރިހަމަވަމުން ދާނެކަމުގެ ޔަޤީންކަން އޮތްކަމަށެވެ.

ރައީސުލްޖުމްހޫރިއްޔާ އެ މެސެޖު ނިންމަވާލައްވާފައިވަނީ ރައީސް އުރްދުޣާނަށް ފުރިހަމަ ސިއްޙަތަކަށް އެދިވަޑައިގެން، އަދި ތުރުކީވިލާތުގައި އަމާންކަމާއި ފާގަތިކަން ދެމެހެއްޓުމަށް އެދިވަޑައިގަންނަވަމުންނެވެ.