ތިން ވަޒީރުންނަށް މަޖިލީހުން ރުހުން ދެއްވައިފި

ރައީސުލްޖުމްހޫރިއްޔާ ކެބިނެޓަށް ގެންނެވި ބަދަލާއި ގުޅިގެން އައްޔަނު ކުރެއްވި ތިން ވަޒީރުންނަށް ރައްޔިތުންގެ މަޖިލީހުން ރުހުން ދީފިއެވެ.

ރައީސުލްޖުމްޖުމްހޫރިއްޔާ ކެބިނެޓަށް ގެންނެވި ބަދަލަކީ، ޚާރިޖީ ވަޒީރުކަމަށް، ޑރ. ޢަބްދުﷲ ޚަލީލް އައްޔަން ކުރެއްވުމާއި މާލީ ވަޒީރުކަމަށް މޫސާ ޒަމީރު އައްޔަން ކުރެއްވުމުގެ އިތުރުން ސިއްޙަތާބެހޭ ވަޒީރުކަމަށް ޢަބްދުﷲ ނާޡިމް އިބްރާހީމް އައްޔަންކުރެއްވުމެވެ.  މި ތިން ބޭފުޅުންނަށްވެސް ރައްޔިތުންގެ މަޖިލީހުން ވަނީ ރުހުން ދެއްވާފައެވެ. ވަޒީރުންނަށް ރުހުން ދެއްވާފައިވަނީ މިއަދު ބޭއްވި މަޖިލީހުގެ ޖަލްސާގައެވެ.

މި މަޤާމުތަކަށް ބަދަލުގެނައުމުގެ ކުރިން ޑރ. ޢަބްދުﷲ ޚަލީލް  ހުންނެވީ ހެލްތު މިނިސްޓަރުގެ މަގާމުގައެވެ. އަދި މޫސާ ޒަމީރު  ފޮރިން މިނިސްޓަރުގެ މަގާމުގައި ހުންނެވިއިރު، ޢަބްދުﷲ ނާޡިމް އިބްރާހީމް ރައީސް އޮފީހުގެ ޕްރިންސިޕަލް ސެކެޓްރީ ޓު ދަ ޕްރެޒިޑެންޓުގެ މަގާމުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެމަނިކުފާނުގެ ކެބިނެޓަށް ބަދަލުތަކެއް ގެންނެވީ މިދިޔަ މަހުގެ 30 ވަނަ ދުވަހުއެވެ.