އދ. ގެ މާހިރުން: ފްރާންސްގައި ބުރުގާ އަޅައިގެން ކުޅިވަރުކުޅުން  މަނާކުރުމަކީ އިންސާނީ ޙައްޤުތަކަށް އަރައިގަތުން

ފްރާންސްގައި މުސްލިމް އަންހެނުންނާއި އަންހެން ކުދިން ބުރުގާ އަޅައިގެން ކުޅިވަރު މުބާރާތްތަކުގައި ބައިވެރިވުން މަނާކޮށްފައިވާ މައްސަލައަކީ އިންސާނީ ޙައްޤުތަކަށް އަރައިގަތުމެއް ކަމަށް ބުނެ އދ. ގެ އިންސާނީ ޙައްޤުތަކާބެހޭ މާހިރުން އެ ނިންމުން އަނބުރާ ގެންދިއުމަށް ގޮވާލައިފިއެވެ.

ފްރާންސްގެ ސަރުކާރުން ވަނީ އެ ޤައުމުގެ ސެކިއުލަރިޒަމްގެ ސިޔާސަތުގެ ދަށުން، 2024 ވަނަ އަހަރު ޕެރިސްގައި ބޭއްވުމަށް ހަމަޖެހިފައިވާ  އޮލިމްޕިކްސްގައި އެ ޤައުމުގެ ކުޅުންތެރިން ދީނީ ނިޝާންތައް، އޭގެ ތެރޭގައި ބުރުގާ ހިމެނޭގޮތަށް، އެޅުން މަނާކޮށްފައެވެ. މީގެ އިތުރުން، ފްރާންސްގެ ފުޓްބޯޅައާއި ބާސްކެޓްބޯޅަ ފެޑެރޭޝަންތަކުން ވެސް ވަނީ ދަށް ފެންވަރުގެ މުބާރާތްތައް ހިމެނޭގޮތަށް، ހިޖާބު އަޅައިގެން ކުޅުންތެރިން މުބާރާތްތަކުގައި ބައިވެރިވުން މަނާކޮށްފައެވެ.

މި މައްސަލައާ ގުޅޭގޮތުން އދ. ގެ  މާހިރަކު ސޮއިކޮށް ނެރުނު ބަޔާނެއްގައި ބުނެފައިވަނީ މި ނިންމުންތަކަކީ "ނިސްބަތުން ބޮޑު އަދި ތަފާތުކުރުން ގެންގުޅޭ ނިންމުންތަކެއް" ކަމަށާއި، އެއީ ފްރާންސްގެ ކުޅުންތެރިންގެ "އަމިއްލަ ކަންކަމުގައާއި އާންމު ތަންތަނުގައި އެމީހުންގެ އަމިއްލަވަންތަކަމާއި، ދީނާއި ޢަޤީދާ ފާޅުކުރުމުގެ ޙައްޤަށާއި، ޘަޤާފީ ދިރިއުޅުމުގައި ބައިވެރިވުމުގެ ޙައްޤަށް އަރައިގަންނަ ކަމެއް" ކަމަށެވެ.

"ބުރުގާ އަޅާ މުސްލިމް އަންހެނުންނާއި އަންހެން ކުދިންނަށް ވެސް ޘަޤާފީ އަދި ކުޅިވަރުގެ ދާއިރާގައި ބައިވެރިވުމުގެ ހަމަހަމަ ޙައްޤު އޮންނަންވާނެއެވެ. އަދި އެމީހުންނަކީ ވެސް ފްރާންސްގެ މުޖުތަމަޢުގެ ބައެއް ކަމުން، އެ މުޖުތަމަޢުގެ ހުރިހާ ދާއިރާއެއްގައި ބައިވެރިވުމުގެ ޙައްޤު އޮންނަންވާނެއެވެ،" މި ބަޔާނުގައި ބުނެފައިވެއެވެ.

މި ބަޔާނުގައި ސޮއިކޮށްފައިވަނީ އދ. ގެ ޘަޤާފީ ޙައްޤުތަކާބެހޭ ޚާއްޞަ ރިޕޯޓަރާއި، މައިނޯރިޓީ މައްސަލަތަކާބެހޭ ޚާއްޞަ ރިޕޯޓަރާއި، ދީނީ މިނިވަންކަމާބެހޭ ޚާއްޞަ ރިޕޯޓަރާއި، އަންހެނުންނާއި އަންހެން ކުދިންނާމެދު ތަފާތުކުރުން ގެންގުޅުމާބެހޭ އދ. ގެ ވަރކިންގ ގްރޫޕްގެ މެންބަރުންނެވެ.