ރީތީގެ މުބާރާތުގައި ދިވެއްސަކު ބައިވެރިވުމަކީ ހިތާމަ ކުރަންޖެހޭ ކަމެއް - ޝައިޚް ޢަބްދުއްސަލާމް

ސައްތައިން ސައްތަ މުސްލިމް ޤައުމެއްގެ ގޮތުގައި ރާއްޖެ އޮންނަ އިރު، ރާއްޖޭގެ ނަމުގައި މިސް ޔުނިވަރސް ފަދަ މުބާރާތެއްގައި ބައިވެރި ވުމަކީ ހިތާމަ ކުރަންޖެހޭ ކަމެއް ކަމަށް ދީނީ ޢިލްމުވެރިޔާ އައްޝެއިޚް އަބްދުއްސަލާމް ދާވޫދު ވިދާޅުވެއްޖެއެވެ. 

ޝައިޚް މިހެން ވިދާޅުވީ ރާއްޖޭގެ ތާރީޚުގައި ފުރަތަމަ ފަހަރަށް ދިވެހި އަންހެނަކު މިސް ޔުނިވާސް މުބާރާތުގައި ބައިވެރިވާ ޚަބަރު ދައުރުވަމުން ދާތީ އެކަމާ ގުޅިގެން އަންހެނުންގެ ހެދުން އެޅުމާއި ހިލޭ ފިރިހެނުންގެ ކުރިމައްޗަށް ނުކުތުމާ ގުޅޭގޮތުން ވާހަކަ ދައްކަވަމުންނެވެ. 

ޝައިޚް ވިދާޅުވީ، ރަސޫލާގެ ޙަދީޘްފުޅުތަކުންވެސް އަންހެނާއަކީ އައުރައެއްކަން އެނގެން އެބައޮތް ކަމަށާއި އެމީހުންނަކީ ރައްކާތެރިވާންޖެހޭ ބައެެއް ކަމުގައެވެ. އެގޮތުން އަންހެނާ ކިތަންމެ ނިވާވެގެން ވިޔަސް މަގު މައްޗަށް ނުކުމެއްޖެނަމަ ޝައިޠާނާ އޭނާގެ މައްޗަށް ފާވެގަންނާނެކަން ޙަދީޘްފުޅު ތަކުން އެނގެން އޮތްކަން ޝައިޚް ފާހަގަ ކުރެއްވިއެވެ. 

ޝައިޚް ވަނީ އެފަދަ ކަންކަމަކީ ދުނިޔޭގައިވެސް މާތް الله ގެ ކޯފާއާއި ކުރިމަތިލާންޖެހޭނެ ކަމެއް ކަން ހަނދާންކޮށްދެއްވާ، މުބާރާތުގައި ބައިވެރި ކޮށްދޭ ފަރާތާއި އެފަރާތުގެ އާއިލާއަށްވެސް الله އަށް ބިރުވެތިވުމަށް ނަޞޭޙަތްތެރިވެފައެވެ. 

އިސްލާމްދީނުގައި އަންހެނާގެ އައުރަ: 

އަންހެނުންގެ ހެދުން އެޅުމާއި ހިލޭ ފިރިހެނުންގެ ކުރިމައްޗަށް ނުކުތުމާ ގުޅޭގޮތުން އިސްލާމްދީނުގައި ވަނީ ވަރަށް ސާފުކޮށް ބަޔާންކޮށްދެއްވާފައެވެ.  އަޙްޒާބު ސޫރަތުގެ 59 ވަނަ އާޔަތުގައި މާތްﷲ ވަޙީ ކުރައްވާފައިވާ ބަސްފުޅެއްގައި ވަނީ

 އޭ ނަބިއްޔާއެވެ! ކަލޭގެފާނުގެ އަނބިއަނބިކަނބަލުންނަށާއި، ދަރިކަނބަލުންނަށާއި، މުއުމިނުންގެ އަންހެނުންނަށް، އެކަނބަލުން އެކަނބަލުންގެ ރިދާތައް (ބޮލާއި މޫނު ނިވާވާގޮތަށް) ތިރިކުރުމަށް އަންގަވާށެވެ! އެއީ އެކަނބަލުން ދެނެގަނެވި، އުނދަގޫ ނުކުރެވުމަށް އެންމެ ގާތް ގޮތެވެ. 

މި އާޔަތުން އެނގިގެންދަނީ އަންހެނުން އެބައިމީހުންގެ މުޅި ހަށިގަނޑު ނިވާކުރަންޖެހޭކަމެވެ.

މީގެ އިތުރުން، ނަބިއްޔާ ﷺ ޙަދީޘްކުރައްވާފައިވެއެވެ:

އަންހެނާއަކީ އައުރައެކެވެ. އޭނާ ނުކުންނަ ހިނދު، ޝައިޠާނާ އޭނާއަށް އަމާޒުކުރެއެވެ.

(ތިރުމިޛީ)

މި ޙަދީޘުން އަންހެނުން އައުރަ ރައްކާތެރިކުރުމުގެ މުހިންމުކަން ހާމަވެގެންދެއެވެ. އަންހެނުން ހިލޭ ފިރިހެނުންގެ ކުރިމައްޗަށް ނުކުންނައިރު، އެކަށީގެންވާ ހެދުމެއްގައި ނުކުތުމަކީ އިސްލާމްދީނުގައި ވަރަށް ބޮޑަށް އަހައްމިއްޔަތުކަން ދެއްވާފައިވާ ކަމެކެވެ.

އަންހެނުންގެ އައުރައަކީ މުޅި ހަށިގަނޑު ކަމުގައި ގިނަ ޢިލްމުވެރިން ވިދާޅުވެފައިވެއެވެ. އެހެންނަމަވެސް، މޫނާއި ދެއަތްތިލަ ފިޔަވައި އެހެން ހުރިހާ ތަނެއް ކަމުގައި ބައެއް ޢިލްމުވެރިން ވިދާޅުވެފައިވެއެވެ. ނަމަވެސް، މި ދެ ރައުޔުގައިވެސް އެއްބަސްވެވަޑައިގަންނަވަނީ އަންހެނުން އެބައިމީހުންގެ ހަށިގަނޑުގެ ބޮޑުބައެއް ނިވާކުރަންޖެހޭ ކަމަށެވެ.

އަންހެނުންގެ އައުރަ ރައްކާތެރިކުރުމަކީ އަންހެނުންގެ ޢިއްފަތްތެރިކަމާއި ކަރާމާތް ހިމާޔަތްކުރުމަށް އޮތް އެންމެ މުހިންމު ވަސީލަތެވެ. ކޮންމެ މީހަކުވެސް މިކަމަށް ސަމާލުކަން ދީ، އިސްލާމްދީނުގެ އުސޫލުތަކާ އެއްގޮތަށް ޢަމަލުކުރުމަކީ ވަރަށް މުހިންމު ކަމެކެވެ.

ކަން މިހެން އޮތުމާއެކު ރާއްޖެ ފަދަ މުސްލިމް ޤައުމަކުން އަންހެނަކު މިސް ޔުނިވަރސް ފަދަ މުބާރާތެއްގައި ބައިވެރިވުން ހުއްޓުމަށް ދައުލަތުގެ ކަންކަމާއި ހަވާލުވެވަޑައިގެން ތިއްބެވި ފަރާތްތަކުންވެސް، މާތް الله އަށް ބިރުވެތިވެ، މިކަންކަން ހުއްޓުވުމަށް ކުރަންޖެހޭ ކޮންމެ ކަމެއް ކުރުމަށް ޝެއިޚް ވަނީ ގޮވާލައްވާފައެވެ.