އޭއެފްސީ ޗެލެންޖް ލީގުގެ ގްރޫޕް ސްޓޭޖުން މާޒިޔާ ކަޓައިފި

ރާއްޖޭގެ ފުޓްބޯޅަ ޗެމްޕިއަން މާޒިޔާ ސްޕޯޓްސް ކްލަބް، އޭއެފްސީ ޗެލެންޖް ލީގުގެ ގްރޫޕް ސްޓޭޖުން ކަޓައިފިއެވެ. ކުވެއިތުގައި ރޭ ކުޅުނު މެޗުގައި އެގައުމުގެ އަލް އަރަބީއާ ދެކޮޅަށް 2-0 އިން ބަލިވުމާ ގުޅިގެން މާޒިޔާއަށް ވަނީ ނޮކްއައުޓް ބުރަށް ދިއުމުގެ ފުރުސަތު ގެއްލިފައެވެ.

މެޗުގެ ފުރަތަމަ 10 މިނެޓުގެ ތެރޭގައި އަލް އަރަބީން ދެ ގޯލު ޖެހިއެވެ. އެގޮތުން ހަތްވަނަ މިނެޓުގައި ޔޫސުފް މަޖީދު ލީޑު ނަގައިދިން އިރު، އެންމެ މިނެޓެއް ފަހުން އަލީ ޚަލަފް ވަނީ ލީޑު ފުޅާކޮށްދީފައެވެ. މި ދެ ގޯލު ވަނުމާ ގުޅިގެން މެޗުގެ ތެރެއަށް ވަންނަން މާޒިޔާގެ ކުޅުންތެރިންނަށް އުނދަގޫވިކަމަށް މާޒިޔާގެ ކޯޗު ޑްރެގަން ޑުކަނޮވިޗް ވަނީ ބުނެފައެވެ.

މާޒިޔާ ހިމެނޭ ގްރޫޕް ބީގައި ރޭ ކުޅުނު އަނެއް މެޗުގައި ތުރުކުމެނިސްތާންގެ އަރްކަޑާގް ވަނީ 2-0 އިން ކިރިގިސްތާންގެ އަބްދީޝް އަތަ ކަންޓް ބަލިކޮށްފައެވެ. މާޒިޔާގެ ފަހު މެޗު ހުކުރު ދުވަހުގެ ރޭ އަބްދީޝް އަތަ ކަންޓްއާ ދެކޮޅަށް ކުޅޭނެއެވެ.

ގްރޫޕްގެ ކޮންމެ ޓީމަކަށް ވެސް އެއް މެޗު ބާކީ އޮތް އިރު، ފުރަތަމަ މެޗުގައި އަރްކަޑާގް އަތުން 2-1 އިން ބަލިވެ، މިރޭ އަލް އަރަބީ އަތުން ބަލިވުމާ ގުޅިގެން މާޒިޔާއަށް ވަނީ އަނެއް ބުރަށް ދިއުމުގެ ފުރުސަތު ގެއްލިފައެވެ.

މިހާރުގެ ހާލަތަށް ބަލާއިރު، ދެ މެޗު ވެސް ކާމިޔާބުކޮށްގެން އަރްކަޑާގް ހަ ޕޮއިންޓާ އެކު އެއްވަނައިގައި އޮތް އިރު، އަލް އަރަބީ އާއި އަބްދީޝް އަތަ ކަންޓްއަށް ވެސް ވަނީ ތިން ޕޮއިންޓް ލިބިފައެވެ. މާޒިޔާއަށް މިހާތަނަށް އެއްވެސް ޕޮއިންޓެއް ނުލިބެއެވެ.