ޙައްޖާއި ޢުމްރާގެ އަޅުކަމަށް ލުއިފަސޭ ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަކީ ރައީސުލްޖުމްހޫރިއްޔާގެ އަމާޒެއް - ނައިބު ރައީސް

ޙައްޖާއި ޢުމްރާގެ އަޅުކަމާއި ގުޅިފައިވާ އިންތިޒާމްތައް ލުއިފަސޭހަކޮށް ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވާކަމެއް ކަމުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަތީފް ވިދާޅުވެއްޖެއެވެ. 

ރާއްޖޭގައި ފުރަތަމަ ފަހަރަށް ބޭއްވި ޙައްޖާއި ޢުމްރާ ކޮންފަރެންސް ޝަރަފްވެރިކޮށްދެއްވާ ވާހަކަފުޅު ދައްކަވަމުން ނައިބު ރައީސް ވިދާޅުވީ ޙައްޖު ފަންޑު ތަރައްޤީކޮށް އައު ވިސްނުންތަކެއް ވިސްނައި ޙައްޖުގެ އަގު ތިރިކުރުމަށް ސަރުކާރުން ގެންގުޅުއްވާ ސިޔާސަތު އަވަސް ކުރިމަގެއްގައި ހަޤީގަތަކަށް ވެގެންދާނެ ކަމަަށެވެ.  

ނައިބު ރައީސް ވިދާޅުވީ ޙައްޖާއި ޢުމްރާގެ ޚިދުމަތްދޭ ފަރާތްތަކަށް ސަރުކާރުގެ ފުރިހަމަ އެއްބާރުލުން ލިބޭނެކަމަށާއި، ރާއްޖޭގައި ފުރަތަމަ ފަހަރަށް ޙައްޖާއި ޢުމްރާ ކޮންފަރެންސެއް ބޭއްވިގެން ދިއުމަކީ ސަރުކާރުން މިކަމަށް ދެއްވާ ޚާއްސަ އަހަންމިޔަތުގެ ހެއްކެއްކަމަށެވެ. 

ނައިބު ރައީސް ވަނީ ޙައްޖާއި ޢުމްރާގެ ޚިދުމަތް ދޭއިރު ވިޔަފާރިއަކަށްވުރެ ބޮޑަށް އެކަމުން ލިބޭ ދަރުމައާއި ހެޔޮ ސަވާބަށް އިސްކަންދެއްވުމަށް ގޮވާލައްވާފައެވެ. އެއްދުވަހުގެ މުއްދަތަށް ކުރިއަށްދާ މި ކޮންފަރެންސް އަކީ ރައީސް ޑރ. މުޙައްމަދު މުޢިއްޒުގެ މެނިފެސްޓޯގައި ހިމަނުއްވާފައިވާ ދިވެހިރާއްޖެއިން މީހުން ހައްޖާއި އުމްރާއަށް ގެންދިއުމުގެ ނިޒާމު އިތުރަށް ހަރުދަނާކުރުމަށްޓައި މަޝްވަރާކުރުމުގެ މަޤުޞަދުގައި ބާއްވާ ކޮންފަރެންސްއެކެވެ.