ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމަށް ހުށަހެޅި އިސްލާހު ފާސްކޮށްފި

ދުންފަތާއި ދުންފަތުގެ ބާވަތްތަކުން ނަގާ އިމްޕޯޓް ޑިއުޓީ ބޮޑުކުރުމަށް ސަރުކާރުގެ ފަރާތުން ހުށަހެޅުއްވި އިސްލާހު މަޖިލީހުން ފާސްކޮށްފިއެވެ.

ނޮވެމްބަރު މަހުގެ 15ވަނަ ދުވަހުން ފެށިގެން ރާއްޖެއަށް ވޭޕާއި އީސިނގިރޭޓު އަދި އެއާގުޅޭ ބާވަތްތައް އެތެރެކުރުން މަނާވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. އެގޮތުން ނޮވެމްބަރު މަހުގެ 15 ވަނަ ދުވަހުގެ ކުރިން ރާއްޖެ އެތެރެކުރާ ދުންފަތާއި ދުންފަތުގެ ބާވަތްތަކުން އިމްޕޯޓް ޑިއުޓީ އިތުރު ކުރުމަށް ޤާނޫނަށް ހުށަހެޅި އިސްލާހުގައިވެއެވެ. 

މަޖިލީހަށް ހުށަހެޅުނު އިޞްލާހުގައި ވާގޮތުން މިހާރު ރާއްޖެ އެތެރެކުރާ ސިނގިރޭޓާއި ބިޑިން 25 ޕަސެންޓް ޑިއުޓީ ނަގާއިރު އަންނަ މަހުން ފެށިގެން  50 ޕަސެންޓް ނަގާނެއެވެ. އަދި އީ-ސިނގިރޭޓު ނުވަތަ ދުންފަތުގެ އިސްތިއުމާލުކުރުމަށް ބޭނުންކުރާ އެނޫން އާލަތްތަކަށް އަޅާ ފްލެވާއާއި ކެމިކަލުން 50 ޕަސެންޓް އަދި ކޮންމެ މިލިލީޓަރަކުން 8 ރުފިޔާގެ ޑިއުޓީ ނަގާނެއެވެ.

މީގެ އިތުރުން ރޯކުރުމަކާނުލައި ހޫނުކޮށްގެން ބޭނުންކުރެވޭ ގޮތަށް އުފައްދާފައި ހުންނަ ދުންފަތުގެ އުފެއްދުންތަކުން 50 ޕަސެންޓް ނަގާގޮތަށްވެސް އިސްލާހުގައި ވެއެވެ. އެއާއެކު އީ-ސިނގިރޭޓާއި ވޭޕް ކުރުމަށް ބޭނުންކުރާ އާލާތަތްކަށް ހީޓަޑް ޓޮބެކޯ އުފެއްދުންތަކުން 200 ޕަސެންޓުގެ ޑިއުޓީ ނެގުމަށްވެސް ސަރުކާރުގެ ފަރާތުން ހުށަހަޅާފައިވާ އިޞްލާހުގައި ވެއެވެ.

މި އިސްލާހު މިއަދު މަޖިލީހުން ފާސްކޮށްފައިވާއިރު މި އިސްލާހަށް ޢަމަލުކުރަން ފަށާނީ ރައީސުލްޖުމްހޫރިއްޔާ މި ބިލު ތަސްދީޤު ކުރެއްވުމުންނެވެ.