ކުރިމަގުގައި ހުރި ވަޒީފާގެ ފުރުސަތުތަކާއި، ވަޒިފާއަކަށް ތައްޔާރުކޮށް ދިނުމަށް "ދާލަން 2024"!

ދިވެހި ޒުވާނުންނަށް ކުރިމަގުގައި ހުރި ވަޒީފާގެ ފުރުސަތުތަކާއި، ވަޒިފާއަކަށް ތައްޔާރު ކޮށްދިނުމަށް އަމާޒުކޮށްގެން މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން އިންތިޒާމްކޮށްގެން ބާއްވާ، ދަ ނޭޝަނަލް ސްކިލްސް އެންޑް ކެރިއަރ އެކްސްޕޯ، "ދާލަން 2024" ނޮވެންބަރު މަހު ބޭއްވުމަށް ތައްޔާރުވެއްޖެއެވެ. 

މަތީތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ވިދާޅުވީ މި އެކްސްޕޯގައި ކޮލެޖުތަކާއި، އިންސްޓިޓިއުޓްތަކާއި، ސަރުކާރުގެ ހިއްސާވާ ކުންފުނިތަކާއި، އިންޑަސްޓްރީގެ ބައިވެރިންނާއި އަދި އެކި މިނިސްޓްރީތަކުގެ ޑިޕާޓްމަންޓްތަކުން 45 އަށްވުރެ ގިނަ ސްޓޯލް ބައިވެރިވާނެ ކަމަށެވެ. މި އެކްސްޕޯ ބޭއްވުމަށް ހަމަޖެހިފައިވަނީ ހުޅުމާލޭ ސެންޓްރަލް ޕާކުގައި ނޮވެންބަރ 15 އިން 16އަށެވެ.

އެ ވުޒާރާއިން އިތުރަށް ވިދާޅުވީ، އެކްސްޕޯގައި ބައިވެރިންނަށް ފަންނީ އަދި ޓެކްނިކަލް ތަމްރީނު (ޓީވެޓް) ގެ ދާއިރާގެ މާހިރުންނާ ބައްދަލު ކުރެވޭނެ އިންތިޒާމުތަކާއި، މަތީ ފަންތީގެ ފަތުރުވެރިކަމާއި، އިމާރާތްކުރުމާއި، ދެމެހެއްޓެނިވި ތަރައްޤީއާއި، އިންޖިނިއަރިންގ ފަދަ މުހިންމު ދާއިރާތަކުގެ ވަޒީފާގެ ފުރުޞަތުތަކާ ބެހޭ މަޢުލޫމާތު ލިބިގެން ދާނެކަމަށެވެ. އޭގެ އިތުރުން އަމިއްލަ އިންސްޓިޓިއުޓްތަކާއި ޓީވެޓް ސެންޓަރުތަކުން ވެސް މައުލޫމާތާއި، ލިބެންހުރި ފުރުސަތުތައް ހާމަކޮށްދެއްވާނެ ކަމަށްވެސް ވިދާޅުވެފައި ވެއެވެ. އެގޮތުން އެކި ފަރާތްތަކުން ލިބެންހުރި ކޯސްތަކާއި، އިތުރަށް ކިޔެވުމުގެ ފުރުޞަތުތަކާއި، ވަޒީފާގެ ފުރުޞަތުތަކާ ބެހޭ މުހިންމު މަޢުލޫމާތު ވެސް " ދާލަން " އެކްސްޕޯއިން ލިބިގެންދާނެއެވެ.

މި އެކްސްޕޯގެ ތެރެއިން ދަރިވަރުންނާއި ޒުވާން ޕްރޮފެޝަނަލުންނަށް އިންޓަރެކްޓިވް ސެޝަންތަކާއި، މަޢުލޫމާތު ފެތުރުމާއި، ލައިވް ޑެމޮންސްޓްރޭޝަންތަކާއި އަދި ޝައުޤުވެރިކަން ހުރި ހަރަކާތްތަކުގެ ތެރެއިން އެކި ވައްތަރުގެ ވަޒީފާގެ މަގުތައް ދެނެގަތުމަށް ފުރުޞަތު ލިބިގެންދާނެ ކަމަށް މައުލޫތު ދެއެވެ.