އިއްޔެގެ ނިޔަލަށް 248 ސިޔާސީ މުވައްޒަފުން މަދުކުރެވިފައިވޭ- ރައީސް އޮފީހުގެ ތަރުޖަމާނު

ޚަރަދު ކުޑަކުރުމުގެ ގޮތުން އިއްޔެގެ ނިޔަލަށް 228 ސިޔާސީ މުވައްޒަފުން މަދުކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

ރައީސް އޮފީހުގެ ތަރުޖަމާނު އެކްސްގައި ކުރެއްވި ޕޯސްޓެއްގައި ވިދާޅުވީ، ސަރުކާރުގެ އިކޮނަމިކް ރިފޯމް އެޖެންޑާގެ ދަށުން ޚަރަދު ކުޑަކުރަން އަޅައި ފިޔަވަޅުތަކުގެ ތެރެއިން، މިހާތަނަށް 31 އޮކްޓޫބަރުގެ ނިޔަލަށް 248 ސިޔާސީ މުވައްޒަފުން މަގާމުން ވަކިކޮށްފައިވާ ކަމަށެވެ. މީގެ އިތުރުން ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމްކުރުމަށް ނިންމާފައިވާ ކަމަށްވެސް ހީނާ ވިދާޅުވިއެވެ. 

ހަމަ އެއާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ކެބިނެޓުން މިހާރު ވަނީ ނިންމާފައި. މިނިޒާމަށް ވަރަށް އަވަހަށް ޢަމަލު ކުރަން ފަށާނެ  

ހީނާ ވިދާޅުވިއެވެ.

ވަކިކުރި މުވައްޒަފުންގެ ތަފުސީލުތައް ސަރުކާރުން ހާމަކޮށްފައިނުވި ނަމަވެސް 15 ދުވަހުގެ ތެރޭ 228 ސިޔާސީ މުވައްޒަފުން މަޤާމުން ވަކިކުރަން ރައީސް ޑރ. މުޙައްމަދު މުއިއްޒު ވަނީ މީގެ ކުރިން ނިންމަވާފައެވެ. އެކަމާ ގުޅިގެން ރައީސް ވިދާޅުވީ 228 ސިޔާސީ މުވައްޒަފުން މަޤާމުތަކުން ވަކިކުރަން ނިންމެވީ، އިގްތިޞާދީ ސިޔާސަތު އިޞްލާޙުކުރުމުގެ ތެރެއިން ޚަރަދުކުޑަކުރުމުގެ ގޮތުން އަޅަން ނިންމެވި ފިޔަވަޅެއްގެ ގޮތުން ކަމަށެވެ. އޭގެ ތެރޭގައި ހަތް ސްޓޭޓް މިނިސްޓަރުންނާއި 43 ޑެޕިއުޓީ މިނިސްޓަރުންނާއި، 109 ސީނިއާ ޕޮލިޓިކަލް ޑިރެކްޓަރުންގެ އިތުރުން 69 ޕޮލިޓިކަލް ޑިރެކްޓަރުން ހިމެނޭ ކަމަށް ރައީސް ވިދާޅުވެފައި ވެއެވެ. އެހެން ނަމަވެސް މިހާރު ވަކި ކޮށްފައިވާ އަދަދަކީ، ރައީސް އިޢުލާނުކުރެއްވި އަދަދަށްވުރެވެސް 20 މުވައްޒަފުން އިތުރު އަދަދެކެވެ.

އިދިކޮޅު މައި ޕާޓީ އެމްޑީޕީން ދަނީ ސަރުކާރަށް ދަތިކުރުމާއެކު ދޮގު ތުހުމަތުކޮށް ސަރުކާރުގައި 2،000 އަށްވުރެ ގިނަ މީހުން ސިޔާސީ އެކި މަޤާމުތަކުގައި ތިބިކަމަށްބުނެ ވާހަކަަތައް ފަތުރަމުންނެވެ.  އެހެން ނަމަވެސް ސިޔާސީ މުވައްޒަފުންގެ އަދަދު 2000އަށް ނާރާ ކަމާއި ސަރުކާރުން ސިޔާސީންގެ އަދަދު މަދުކުރަމުންދާކަން މިވަނީ ސާބިތު  ވެފައެވެ.