ސައްހަ ވިސާއެއް ނެތި އުޅެމުންދިއަ 05 ބިދޭސީއަކު އިމިގްރޭޝަންގެ ބެލުމުގެ ދަށަށް!

ސައްޚަ ވިދާ ނެތި ހުޅުމާލޭގައި އުޅެމުންދިޔަ 5 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން ވިދާޅުވީ ހުޅުމާލޭގައި ވެހިކަލް ދޮވެ ސާފުކުރުމަށް ބިދޭސީން ތިބޭ 5 ސަރަހައްދެއް ބަލައި ފާސްކޮށްފައިވާ ކަމަށެވެ. އަދި ސައްހަ ވިސާ ނެތި ގަވާއިދާ ޚިލާފަށް އުޅުނު 5 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާކަމަށް އިމިގްރޭޝަނުން ވިދާޅުވެއެވެ.

މާލެއާއި ހުޅުމާލޭގެ ގިނަ ސަރަހައްދު ތަކުގައި ވެހިކަލް ދޮވެ ސާފުކުރުމުގެ މަސައްކަތުގައި ބިދޭސީން ހަރަކާތްތެރިވާ މަންޒަރު ވަރަށް ގިނައިން ފެނެއެވެެ. އެގޮތުން  މާލޭން ފާހަގަ ކޮށްލެވޭ ސަރަހައްދު ތަކުގެ ތެރޭގައި ޕާކިންގޒޯން ތަކާއި ކާނިވާ ސަރަހައްދާއި، އެކުވެނި ޓްރެކް ސަރަހައްދު އަދި ފުޑް ކޯޓު ސަރަހައްދުފަދަ ތަންތަން ފާހަގަކޮށްލެވެއެވެ. ހުޅުމާލޭގައިވެސް ޕާކީން ޒޯން ތަކުންނާއި މަގުތަށް މަތިން ބިދޭސީން ވެހިކަލް ސާފުކުރަން ތިބޭ މަންޒަރު ފެނެއެވެ. 

ބިދޭސީންގެ މައްސަލަ އަކީ ރާއްޖޭގައި ހައްލުކުރަން ޖެހި، މިހާތަނަށް ހައްލެއް ނުލިބި އޮތް މައްސަލައެކެވެ. ނަމަވެސް މި ސަރުކާރުން ބިދޭސީންގެ މައްސަލަ ހައްލުކުރުމަށް ޢަމަލީ މަސައްކަތް ފަށާފައިވާއިރު ގަވައިދާ ޚިލާފަށް އުޅެމުންދާ ގިނަ ބިދޭސީންނާއި މެދު ވަނީ ފިޔަވަޅުވެސް އަޅާފައެވެ. އެގޮތުން މިހާތަނަށް ގަވާއިދާ ޚިލާފަށް އުޅުނު 4000އަށް ވުރެ ގިނަ ބިދޭސީން އަނބުރާ ގައުމަށް ފޮނުވާލާފައިވާކަމަށް އިމިގްރޭޝަނުން ވިދާޅުވެއެވެ. މީގެ ތެރޭގައި ގަވާއިދާ ޚިލާފަށް އުޅުމުގެ ސަބަބުން އިމިގްރޭޝަންގެ ބެލުމުގެދަށަށް ގެންދިޔަ ފަރާތްތަކާއި އަމިއްލައަށް ފުރަން ބޭނުން ވެގެން އެކަމަށް އެދިގެން ފުރުވާލި ފަރާތްތަކުގެ އިތުރުން އިމިގްރޭޝަނުން ނޯޓިސްދިނުމަށްފަހު ފުރުވާލެވުނު ފަރާތްތައް ހިމެނެއެވެ.