ބޭރުގައި ކިޔަވާ ދަރިވަރުންގެ ކާޑު ލިމިޓު ބޮޑުކުރަން ޚާއްޞަ ސްޓޫޑަންޓް ޕޯޓަލްއެއް!

ރާއްޖެއިން ބޭރުގައި ތަޢުލީމު ޙާސިލްކުރާ ދަރިވަރުންނަށް ބޭންކް އޮފް މޯލްޑިވްސް އިން ދޭ ޑޮލަރު ލިމިޓް ބޮޑުކުރަން އެކަމަށް ޚާއްސަ ސްޓޫޑަންޓް ޕޯޓަލްއެއް ހަމަޖައްސައިފިއެވެ.

ބޭންކް އޮފް މޯޯލްޑިވްސްއިން އެކްސްގައި ކުރި ޕޯސްޓެއްގައި ވަނީ މިއަދުން ފެށިގެން ރާއްޖޭން ބޭރުގައި ތަޢުލީމު ހާސިލްކުރަމުންދާ ދަރިވަރުންނަށް ކާޑު ލިމިޓް އިތުރުކުުރުމަށް މި ޕޯޓަލް މެދުވެރިކޮށް އެދެވޭނެކަމަށެވެ.  އެގޮތުން އެކަމަށް ޚާއްޞަކޮށް ތައްޔާރުކޮށްފައިވާ ޕޯޓަލްއަށް ރަޖިސްޓަރ ކޮށްގެން ދަރިވަރުންނަށް ޑޮލަރ ލިމިޓް 1200 ޑޮލަރަށް ބޮޑުކުރެވޭނެ ކަމަށް ބީއެމްއެލްއިން ބުނެފައިވެއެވެ.

މި ޕޯޓަލް މެދުވެރިކޮށް ލިމިޓް ބޮޑު ކުރުމަށް، ރަޖިސްޓްރީ ވުމަށް ޕާސްޕޯޓް ކޮޕީ، ސްޓޫޑެންޓް ވިސާ އަދި އެދަރިވަރަކު ކިޔަވަމުން އަންނަ ޔުނިވާސިޓީ ނުވަތަ ކޮލެޖެއްގެ ސިޓީ ހުށަހަޅަން ޖެހޭނެއެވެ. އެ ސިޓީގައި ދަރިވަރު ކިޔަވާ ކޯހުގެ ތަފްސީލާއި އެހެނިހެން ތަފްސީލު ހުންނަން ވާނެކަމަށް ބީއެމްއެލްއިން ބުނެއެވެ. 

ރާއްޖެއިން ބޭރުގައި ކިޔަވާ ދަރިވަރުންނަށް ބީއެމްއެލްގެ ރުފިޔާ ޑެބިޓް ކާޑުތަކުން ޑޮލަރު ލިބޭ މިންވަރު ބޮޑުކުރަން ސަރުކާރުން ނިންމެވީ މިދިޔަ މަހުގެ 23 ވަނަ ދުވަހުއެވެ. ކުރިން ރާއްޖެއިން ބޭރުގައި ކިޔަވާ ދަރިވަރުންނަށް ލިބެނީ 750 ޑޮލަރެވެ.އެހެން ނަމަވެސް މިއަދުން ފެށިގެން ދަރިވަރުންނަށް ބީއެމްއެލްގެ ޑެބިޓް ކާޑު މެދުވެރިކޮށް ޑޮލަރު ނެގޭ މިންވަރު 1200 ޑޮލަރަށް އިތުރު ވެގެންދާނެއެވެ.