ޕީއެސްއެމުން މީޑިއާ ކައުންސިލްގެ މައްސަލަ މަޖިލީހަށް ހުށަހަޅައިފި

ނޫސްވެރިކަމުގެ އެވޯޑް ހަފްލާ ރޭ ޕަބްލިކް ސަރވިސް މީޑިއާގެ ޓީވީ ޗެނަލްތަކުން ލައިވްކޮށް ދެއްކިއިރު، ޕީއެސްއެމްގެ އެޑްޓޯރިއަލް ކޮންޓެންޓާ ހިލާފަށް އަދި ނޫސްވެރިކަމުގެ އާއްމު މިންގަނޑާ ހިލާފް ވީޑިއޯއެއްް އެ ހަފްލާ އިންތިޒާމްކުރި ފަރާތުން ދައްކާފައިވާތީ އެމައްސަލަ ޕީއެސްއެމުން މީޑިއާ ކައުންސިލްގެ މައްސަލަ މަޖިލީހަށް ހުށަހަޅައިފިއެވެ.

ޕީއެސްއެމް އިން ނެރުނު ނޫސް ބަޔާނެއްގައި ވަނީ އެވޯޑް ލިބޭ ކެޓަގަރީތަކާ އެ ކެޓަގަރީއަށް ނޮމިނޭޓް ވެފައިވާ ފަރާތްތައް މީޑިއާ ކައުންސިލަށް އެނގޭއިރު، ކުރިއަލާ އެނގުމަކާ ނުލައި އެ ވީޑިއޯ ދައްކާފައިވަނީ ގަސްދުގައި ދުރާލާ ތައްޔާރުވެގެންކަމަށެވެ. އަދި މިކަން މީޑިއާ ކައުންސިލުން ކޮށްފައިވަނީ ޕީއެސްއެމްގެ އެޑްޓޯރިއަލް އާ ޚިލާފް ކޮންޓެންޓު ޕީއެސްއެމުން ދެއްކުމުގެ ނިޔަތުގައި ކަމަށްވެސް ޕީއެސްއެމްގެ ބަޔާނުގައި ވެއެވެ. ޕީއެސްއެމުން ވަނީ މީޑިއާ ކައުންސިލްގެ މި އަމަލު ހަރުކަށި އިބާރާތުން ކުއްވެރިކޮށްފައެވެ.

ޕީއެސްއެމް އިން ބުނެފައިވަނީ ލައިވް ކަވަރޭޖްގައި ދައްކާ ވީޑިއޯތަކަކީ އެޑިޓޯރިއަލް އަށް ފެތޭ ކޮންޓެންޓަށް ވާން ޖެހޭނެކަމަށެވެ. ދައުލަތުގެ މީޑިއާއިން ބުނީ މިކަމަކީ ޕީއެސްއެމަށް ރައްޔިތުން ކުރަމުން އަންނަ އިތުބާރު ގެއްލި ކުންފުނީގެ މައްޗަށް ގާނޫނީ ވާޖިބުތައް އަދާކުރުމަށް ހުރަސްއެޅި އިއާދަނުކުރެވޭ ވަރުގެ ގެއްލުންތަކެއް ލިބިދާނެ ކަމެއްކަމަށް ދެކޭ ކަމަށެވެ.

މި މައްސަލައާއި ގުޅިގެން ޕީއެސްއެމްގެ ނިއުސް އޮޕަރޭޝަންސް މަޤާމުގައި ހުންނެވި އަދި މީޑިއާ ކައުންސިލްގެ ރައީސަކަށް ހުންނެވި އަހްމަދު މުސްތަފާ އޭނާ ހުންނެވި މަގާމުން ވަކިކުރައްވާފައިވާ ކަމަށް މީޑިއާ ތަކުން ރިޕޯޓް ކޮށްފައިވެއެވެ. މުސްތަފާއަކީ ދައުލަތުގެ މީޑިއާގައި 30 އަހަރަށްވުރެ ގިނަ ދުވަހު މަސައްކަތްކޮށްފައިވާ ބޭފުޅެކެވެ.