އިސްލާމީ މަރުކަޒަށް 40 އަހަރު ފުރޭ މުނާސަބަތާއި ގުޅިގެން މުވައްޒަފުންގެ މަސައްކަތު ދުވަހެއް!

އިސްލާމީ މަރުކަޒަށް 40 އަހަރު ފުރޭ މުނާސަބަތާއި ގުޅިގެން، އިސްލާމީ މަރުކަޒު ސާފުކޮށް ރީތިކުރުމުގެ މަސައްކަތް އިސްލާމީ ކަންތައްތަކާ ބެހޭ ވުޒާރާގެ މުވައްޒަފުން ކުރިއަށް ގެންގޮސްފިއެވެ.

އިއްޔެ ހެނދުނުން ފެށިގެން ހަވީރު 5:15 އަށް ކުރިއަށްގެންދި މި ހަރަކާތުގައި ވުޒާރާގެ އިސްވެރިންނާއި، މުވައްޒަފުން ވަނީ ބައިވެރިވެފައެވެ. އެގޮތުން އިސްލާމީ މަރުކަޒުގައި ކުލަ ލުމުގެ މަސައްކަތާއި، ގަސްބުރުތައް ސާފުކޮށް ރީތިކުރުމުގެ މަސައްކަތާއި، މުންނާރު ސާފުކުރުމާއި ކުނި އުކާލުމުގެ މަސައްކަތްތައް ކުރިއަށް ގެންގޮސްފައިވެއެވެ.

 ހެޔޮ އެދޭ އެކި ފަރާތްތަކުންނާއި، ވުޒާރާގެ މުވައްޒަފުން އަމިއްލަ ޖީބުން ވަނީ މަރުކަޒުގެ ބަގީޗާތައް ރީތިކުރުމަށް ގަސްފަދަ ތަކެތި ހޯދާފައެވެ. މި މަސައްކަތްތަކުގައި ވުޒާރާގެ ގިނަ އަދަދެއްގެ މުވައްޒަފުން ބައިވެރިވެފައިވާކަމަށް އެވުޒާރާއިން ބުނެފައިވެއެވެ.

އިސްލާމީ މަރުކަޒުގެ މުންނާރު ވަށައިގެން ހަދާފައި ހުރި މަސްފެންގަނޑު މަރާމާތުކޮށް އަލުން ހުޅުވުމަށްވެސް މަސައްކަތްތަކެއް ދަނީ ކުރަމުންނެވެ. މި މަސައްކަތާއި ހަވާލުވެފައި ވަނީ ސްޓެލްކޯއިންނެވެ.

ރާއްޖޭގެ އިސްލާމީ މަރުކަޒު ހުޅުވާފައިވަނީ 1984 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހުއެވެ. އޭރުގެ ސަރުކާރުން ޚާއްސަ އިސްކަމެއް ދެއްވައިގެން އިމާރާތް ކުރެއްވި މި މަރުކަޒު ހުޅުވުމަށް ރާއްޖޭން ބޭރުންވެސް މީހުން ވަޑައިގެންފައިވެއެވެ. އިސްލާމީ މަރުކަޒަކީ ރާއްޖޭގައި އެންމެ ގިނަދުވަސްވީ ތަރީޚީ ބިނާ ތަކުގެ ތެރެއިން އެއް ބިނާއެވެ.

އިސްލާމީ މަރުކަޒަށް 40 އަހަރު ފުރޭނީ ނޮވެމްބަރު މަހުގެ 11 ވަނަ ދުވަހުއެވެ. މަރުކަޒަށް 40 އަހަރު ފުރުން ފާހަގަކުރުމަށް އިސްލާމީ ކަންތައްތަކާބެހޭ ވުޒާރާއިން ދަނީ އެކި ކަންކަން  ރާވަމުންނެވެ.