އިންޝުއަރެންސް ނުލިބޭ ހާލަތުގައި އާސަންދަ ލިބޭނެ- އެންސްޕާ

އަމިއްލަ އިންޝުއަރެންސް ނުލިބޭ ހާލަތުގައި އާސަންދަ މެދުނުކެނޑި ލިބޭނެކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީން ވިދާޅުވެއްޖެއެވެ.

އެންސްޕާއިން ނެރުނު ނޫސް ބަޔާނެއްގައި ވަނީ، އަމިއްލަ އިންޝުއަރެންސް ކަވަރޭޖް ނުވަތަ ޚިދުމަތް ނުލިބޭ ހާލަތެއްގައި އާސަންދަ މެދުވެރިކޮށް ބޭސްފަރުވާގެ ޚިދުމަތް ލިބޭނެކަމަށެވެ. އަދި އަމިއްލަ އިންޝުއަރެންސް ކުންފުނިތަކުން ކޭޝްލެސް ޕޭމެންޓް ހުއްޓާލައި، އިންޝުއަރެންސް ޕޮލިސީން ކަވަރޭޖް ނުލިބި އަމިއްލަ ޖީބުން ފައިސާ ދައްކަން ޖެހޭ ހާލާތްތަކުގައި އާސަންދަ ޚިދުމަތް ކުރިއެކޭ އެއްގޮތަށް ލިބޭނެ ކަމަށްވެސް ބުނެފައިވެއެވެ. 

އާސަންދައިން ވަނީ މިމަހުގެ އެއްވަނަ ދުވަހުން ފެށިގެން އެކުންފުނީގެ ސްކީމަށް ގެންނަ ބަދަލުތައް އިއުލާންކޮށްފައެވެ. އެގޮތުން، ޞިއްޙީ ޚިދުމަތްދޭ މަރުކަޒުތަކުން ޚިދުމަތް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރަންސް އޮންނަ ފަރާތްތަކުން ހޯދާ ޚިދުމަތްތަކަށް ބިލު ކުރުމުގައި ޕްރައިވެޓް އިންޝުއަރަންސަށް އިސްކަންދިނުމަށް ވަނީ ހަމަޖައްސާފައެވެ. 

މި ބަދަލާއެކު އިންޝުއަރެންސް ހިދުމަތްދޭ ބައެއް ކުންފުނިތަކުން ވަނީ އެ ކުންފުނިތަކުން ފޯރުކޮށްދޭ ކޭޭޝްލެސް ހިދުމަތް ހުއްޓާލައި، ހިދުމަތަށް އަމިއްލަ އަތުން އަގު ދެއްކުމަށްފަހު ބިލުކުރަންޖެހޭ ގޮތަށް ޚިދުމަތް ބަދަލުކޮށްފައެވެ.

އެންސްޕާއިން ވަނީ މިފަދަ ކަންކަމުގެ ހަޤީޤަތް އޮޅޭގޮތަށް މައުލޫމާތު ނުފެތުރުމަށާއި މިކަމުގެ ސައްޙަ މައުލޫމާތު ރައްޔިތުން ސާފުކުރުމަށް އިލްތިމާސްކުރައްވާފައެވެ. މި ބަދަލާއި ގުޅޭގޮތުން މަޢުލޫމާތު ބޭނުންވާ ފަރާތްތަކަށް އާސަންދަ ކޯލް ސެންޓަރު ނަންބަރު 1400އަށް ގުޅުއްވައިގެން އެމައުލޫމާތު ސާފުކުރެވޭނެއެވެ