ޣައްޒާގެ އުތުރުގައި ޕޯލިއޯ ވެކްސިން ދިނުން އިތުރަށް ކުރިއަށްގެންދަނީ

ޣައްޒާގެ އުތުރުގައި ހިންގަމުންދާ ޕޯލިއޯ ވެކްސިން ދިނުމުގެ މަސައްކަތް އާދީއްތަ ދުވަހު ވެސް ގެންދިއުމަށް ވަނީ ހަމަޖެހިފައެވެ. މިއީ ޔުނިސެފުން ބުނާގޮތުގައި ކްލިނިކެއްގެ ކައިރީގައި ހިނގި ހަމަލާއެއްގައި ތިން ކުދިން ޒަޚަމުވުމަށްފަހު ދެވަނަ ދުވަހަށް ވެކްސިން ދިނުމުގެ މަސައްކަތް ކުރިއަށް ގެންދިއުމަށް ނިންމާފައިވާ ނިންމުމެކެވެ.

މި ހަމަލާ ދިން ފަރާތެއް ޔުނިސެފުން ބުނެފައެއް ނުވެއެވެ. ނަމަވެސް ޣައްޒާގެ ސިވިލް ޑިފެންސް އޭޖެންސީގެ އޮފިޝަލަކު  އޭއެފްޕީއަށް ބުނެފައިވަނީ މި ހަމަލާ ދީފައިވަނީ އިސްރާއީލްގެ ކޮޑްރޯކޮޕްޓަރަކުން ކަމަށެވެ. އިސްރާއީލުން ބުނެފައިވަނީ މިކަން ތަޙުޤީޤު ކުރަމުންދާ ކަމަށާއި، ނަމަވެސް މި ހަމަލާއާ އެ ޤައުމުގެ ގުޅުމެއް އޮތްކަމަކަށް ނުބެލެވޭ ކަމަށެވެ.

ވެކްސިން ދިނުމުގެ މަސައްކަތް ކުރިއަށް ގެންދިއުމުގައި އެހީތެރިވަމުންދާ ޔުނިސެފުން ޝެއިޚް ރަޟްވާން ކްލިނިކަށް ދިން ހަމަލާ ސިފަކޮށްފައިވަނީ "އާންމު ރައްޔިތުންނަށް ދޭ ނުރައްކާތެރި ހަމަލާތަކުގެ އިތުރު މިސާލެއް" ގެ ގޮތުގައެވެ.

ވެކްސިން ދިނުމުގެ ދެވަނަ ފިޔަވަހި ފެށުނީ ހޮނިހިރު ދުވަހުއެވެ. މިއީ އޮކްޓޯބަރު މަހު އިސްރާއީލްގެ ގަދަ ބޮމުގެ ހަމަލާތަކުގެ ސަބަބުން، ގިނަ އަދަދެއްގެ މީހުން ހިޖުރަކުރަން ޖެހުމާއި، އަދި އެ ސަރަޙައްދަށް ވަދެވޭގޮތް ނުވުމުގެ ސަބަބުން ފަސްކުރަން ޖެހުނު މަސައްކަތެކެވެ.

އޯގަސްޓް މަހު ޣައްޒާގައި 25 އަހަރު ފަހުން ފުރަތަމަ ފަހަރަށް ޕޯލިއޯގެ ކޭސްއެއް ފެނުނެވެ. މި ބަލީގެ ސަބަބުން ކުޑަކުއްޖަކު ވަނީ ފައިބާރު ދޫވެފައެވެ. މިކަމާ ގުޅިގެން ވެކްސިން ދިނުމުގެ ޕްރޮގްރާމް ފެށުނެވެ.

ވެކްސިން ދިނުމުގެ މަސައްކަތް އަލުން ފަށަމުންދަނީ އދ. އާއި އިންސާނީ އެހީގެ 15 ޖަމްޢިއްޔާއަކުން ޣައްޒާގެ އުތުރުގެ ހާލަތު ގޯސްކަމަށް ބުނެ، އިސްރާއީލްގެ އެއްގަމު ހަމަލާތައް ފެށި ފަހުން ގާތްގަނޑަކަށް އެއް މަސްދުވަސް ފަހުންނެވެ.

ވެކްސިން ދިނުމުގެ މަސައްކަތް އަލުން ފެށުމަށްޓަކައި ހަނގުރާމައިގެ ވަގުތީ ހުއްޓުމެއް ގެނައުމަށް އެއްބަސްވެފައިވާކަމަށް ދުނިޔޭގެ ސިއްޙީ ޖަމްޢިއްޔާ (ޑަބްލިއުއެޗްއޯ) އިން ބުނެފައިވެއެވެ. މި މަސައްކަތް ކުރިއަށްދާނީ ތިން ދުވަހުގެ މުއްދަތަށެވެ.