“އޮޅުހިޔާ” އަށް ގެންދާ ބުޅާ ތަކުގެ ފުރަތަމަ ބެޗް މިހަފްތާތެރޭގައި ނަގަންފަށާނެ: ވަޒީރު ރަމީލާ

“އޮޅުހިޔާ” އަށް ގެންދާ ބުޅާ ތަކުގެ ފުރަތަމަ ބެޗް މިހަފްތާތެރޭގައި ނަގަންފަށާނެ ކަމަށް ދަނޑުވެރިކަމާ ދިރޭތަކެއްޗާއި ބެހޭ ވަޒީރު ޑރ ޢާއިޝަތު ރަމީލާ ވިދާޅުވެއްޖެއެވެ.

ވަޒީރު ރަމީލާ މިހެން ވިދާޅުވީ ދައުލަތުގެ ޓީވީގެ ޕްރޮގްރާމެއްގައި ވާހަކަފުޅު ދައްކަވަމުންނެވެ.

ދަނޑުވެރިކަމާއި ދިރޭތަކެއްޗާ ބެހޭ ވަޒީރު ރަމީލާ ވިދާޅުވީ މާލެ ސަރަހައްދުގެ މަގުތަކުގައި 4000 އަށްވުރެ ގިނަ ބުޅާ އުޅޭކަމަށެވެ. މިބުޅާތަކުގެ ތެރޭގައި ތަފާތު ހާލަތްތަކުގައި ހުރި ބުޅާތަައް ފާހަގަ ކުރެވޭ ކަމަށް ޑރ ރަމީލާ ވިދާޅުވިއެވެ. އަދި މިބުޅާތައް އެއްފަހަރާ ނެގުމަކީ ފަސޭހަ އަދި އެންމެ ރައްކާތެރި ކަމަކަށްވެސް ނުވާނެކަމަށްވެސް ވަޒީރު ވިދާޅުވިއެވެ. ވަޒީރު ޑރ. ރަމީލާ ވިދާޅުވީ ފެސިލިޓީއަށް ބުޅާތައް ގެންދިޔުމަށް ޚާއްސަ ޕްލޭނެއް ހަދާފައިވާ ކަމަށެވެ. އެގޮތުން މިޕްލޭންގެ ދަށުން ބުޅާތައް ނެގަމުންދާނީ ވަކިވަކި ބެޗް ތަކަށް ކަމަށާއި، އަދި ފެސިލިޓީއަށް ގެންދާ ބުޅާތަކުގެ ޞިއްޙީ ޙާލަތު ދެނެގަނެވި ފަރުވާ ދެވޭނެ ކަމަށްވެސް ވަޒީރު ރަމީލާ ވިދާޅުވިއެވެ.

މީގެއިތުރުން ފެސިލީޓީއަށް ގެންދެވޭ ހިސާބުން ބުޅާތައް ރަޖިސްޓްރީ ކުރެވޭނެކަމަށާއި، ވެރިފަރާތެއް ނެތް ބުޅަލުގެ އާބާދީ ދައްކުރުމުގެ ގޮތުން މަސައްކަތްތަކެއް ކުރެވޭނެކަން ވަޒީރު ޑރ ރަމީލާ ފާހަގަކުރެއްވެވިއެވެ. އެގޮތުން ވެރިފަރާތެއް ނެތި އުޅޭ ބުޅާތަކުގެ އާބާދީ ކޮންޓްރޯލް ކުރުމުގެ ގޮތުން އެފަދަ ބުޅާތަކުގެ ތެރެއިން އަންހެން ބުޅާތަކުގެ ނުވިހާ އޮޕަރޭޝަން ކުރާނެ ކަމަށްވެސް ވަޒީރު ރަމީލާ ވަނީ ވިދާޅުވެފައެވެ. 

މިހާރު ޤާއިމް ކުރެވިފައިވާ ފެސިލިޓީގައި އެއްފަހަރާ 4000 ބުޅާ ގެންގުޅެވޭނެ ކަމަށެވެ. އަދި މިފެސިލިޓީން ފަރުވާދޭނީ އެތަނަށް ގެންދާ ބުޅަލަށް އެކަނި ނޫންކަމަށާއި ޕެޓްގެ ގޮތުގައި އާންމުން ގެންގުޅޭ ބުޅާތަކަށްވެސް ފަރުވާ ދޭނެކަމަށް ވަޒީރު ވިދާޅުވިއެވެ.

 ވަޒީރު ރަމީލާ ވިދާޅުވީ ޕެޓް ކެއަރ ފެސިލިޓީ ގާއިމްކުރީ ހަމައެކަނި ބުޅާތަކަށް ރައްކާތެރި މާހައުލެއް ހޯދާދިނުމުގެ ބޭނުމުގައި ނޫންކަަމަށާއި، ބުޅަލުގެ ސަބަބުން އިންސާނުންނަށް ޖެހޭ ބަލިތަކުން ސަލާމަތް ކުރުމާއި އާންމުންނަށް ދިމާވާ ދަތިތައް ހައްލުކުރުމަކީވެސް މިފެސިލިޓީ ޤާއިމްކުރުމުގެ ބޭނުމެއް ކަމަށް އެކަމަނާ ވިދާޅުވިއެވެ.

 އަދި މި ޕްލޭނާ އެއްގޮތަށް މަސައްކަތްތައް ދާނަމަ ކުރިއަށް އޮތް މަސްތަކުގައި މިކަމުގެ އެދެވޭ ނަތީޖާ ފެންނާނެކަމަށްވެސް ވަޒީރު ޑރ ރަމީލާ ވިދާޅުވިއެވެ.ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ.އައިޝަތު ރަމީލާ ވިދާޅުވީ ފެސިލީޓައް ބުޅާތަައް ގެންދެވި މަސައްކަތް ރަނގަޅަށް ހިނގަން ފެށުމުން އާންމުންގެ ތެރެއިން ބުޅާ އެޑޮޕްޓް ކުރަން ބޭނުންވާ ފަރާތްތަކަށް އެފުރުސަތު ހުޅުވާލާނެކަމަށެވެ. 

ރާއްޖޭގައި މިވަގުތު ހުރީ ވެޓްގެ ގޮތުގައި ތަމްރީނުވެފައިވާ އެންމެ ދިވެއްސެއްކަމަށް ވަޒީރު ރަމީލާ ވިދާޅުވިއެވެ. އެހެންނަމަވެސް މިދާއިރާއިން އިތުރު ދިވެހިން ކިޔަވަންދާކަން ވަޒީރު ފާހަގަކުރެއްވިއެވެ. އަދި މުސްތަޤްބަލުގައި މިފެސިލިޓީގައި މަސައްކަތްކުރާނީ މުޅިންވެސް ދިވެހިން ކަމަށް ވަޒީރު ވިދާޅުވިއެވެ.މިފެސިލީޓީގައި ބުޅަލުގެ ގްރޫމިންއަށް ސެލޫނަކާއި ބުޅާ ގެންގުޅޭ ފަރާތްތަކުން ދަތުރުދާނަމަ އެނބުރި އަންނަންދެން ފެސިލިޓީއަށްލުމުން ބަލާދިނުމުގެ ޚިދުމަތްވެސް ދެނޭކަމަށްް ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ.އައިޝަތު ރަމީލާ ވިދާޅުވިއެވެ.