ވަޤުފް ބިނާއިން އަހަރަކު 10 މިލިއަން އިސްލާމިކް ވަޤުފު ފަންޑަށް ލިބޭނެ: ވަޒީރު ޝަހީމް

އަލަށް ޤާއިމްކުރާ ވަޤުފް ބިނާއިން އަހަރަކު 10 މިލިއަން އިސްލާމިކް ވަޤުފު ފަންޑަށް  ލިބޭނެކަމަށް އިސްލާމީ ކަންތައްތަކާ ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

އެކްސްގައި ހިއްސާކުރެއްވި ޕޯސްޓެއްގައި ވަޒީރު ވިދާޅުވީ ރާއްޖޭގެ ދެވަނަ ޒަމާނީ ވަޤްފު ބިނާ (ދާރުލްއަރްޤަމް)ގެ ޢަމަލީ މަސައްކަތްފެށުމުގެ އެއްބަސްވުމުގައި 26 އޮކްޓޯބަރ 2025 ވާ އާދިއްތަ ދުވަހު ސޮއިކުރުމަށް ހަމަޖެހިފައިިވާކަމަށެވެ. އަދި މިތަނުން އަހަރަކު 10 މިލިއަން އިސްލާމިކް ވަޤުފު ފަންޑަށް ލިބޭނެ ކަމަށްވެސް ވަޒީރު ވިދާޅުވެފައި ވެއެވެ. 

ރާއްޖޭގެ ދެވަނަ ޒަމާނީ ވަޤްފު ބިނާ (ދާރުލްއަރްޤަމް) އަމަލީ މަސައްކަތްފެށުމުގެ އެއްބަސްވުމުގައި 26 އޮކްޓޯބަރ 2025 ގައި ސޮއިކުރާނެ. މިތަނުން އަހަރަކު 10 މިލިއަން އިސްލާމިކް ވަޤުފު ފަންޑަށް ލިބޭނެ. އިންޝާ ﷲ pic.twitter.com/WSEzmaGPEu

— Mohamed Shaheem Ali Saeed (@Mohamedshaheem1) October 23, 2025

މާލެ ސަރަހައްދުގައި ވަޤުފްގެ ދެ މަޝްރޫޢެއް ކުރިއަށް ގެންދިއުމަށް ހަމަޖެހިފައިވާއިރު އެ ދެ މަޝްރޫޢުގެ ނަފާ މުޅި ރާއްޖެއަށް ބެހިގެންދާނެކަމަށާއި މި ހުރިހައި މަޝްރޫޢެއްގެ އަމަލީ މަސައްކަތް ލަސްވެގެން ޖަނަވަނީ މަހުގައި ފެށިގެން ދާނެކަމަށް މީގެ ކުރިން ވަޒީރު ވިދާޅުވިއެވެ. 

މާލެ ސަރަޙައްދުގެ އިތުރުން އައްޑޫ ސިޓީ، ފުވައްމުލައް ސިޓީ، ތިނަދޫ ސިޓީ، ކުޅުދުއްފުށި ސިޓީގެ އަދި ގއ. ވިލިނގިލީގައި ވަޤުފް މަޝްރޫޢު ފެށުމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވަނީ ނިންމަވާފައެވެ. މިގޮތުން އައްޑޫ ސިޓީގައި 23 މިލިއަން، ފުވައްމުލައް ސިޓީގައި 15 މިލިއަން، ކުޅުދުއްފުށި، 10 މިލިއަން، ތިނަދޫ 10 މިލިއަން، ވިލިނގިލި 10 މިލިއަން ވަޤުފު އުފައްދަން އިންވެސްޓްކުރެވިގެންދާނެކަމަށާއި މި ޕްރޮޕަޓީތަކުން ލިބޭ ނަފާ ޚަރަދު ކުރެވިގެންދާނީ އެސިޓީތަކުގެ އިސްލާމީ ކަންކަން ކުރިއެރުވުމަށްކަމަށެވެ. އެގޮތުން މިސްކިތަކާއި ޤުރުއާނުގެ އިލްމު ފެތުރުމަށް މިކަމުން ޚަރަދުކުރެވިގެންދާނެކަމަށް ވަޒީރު ވިދާޅުވިއެވެ.

ވަޤުފް މަޝްރޫޢުތަކަކީ އިސްލާމީ ދާއިރާއިން ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގައި ހިމެނޭ އެންމެ ބޮޑު މަޝްރޫޢުއެވެ. މި މަޝްރޫޢުތަކަކީ ދިވެހިރާއްޖޭގެ އިސްލާމީ ދާއިރާއަށް އިންޤިލާބީ ބަދަލުތަކެއް ގެނުވާނެ މަޝްރޫޢުތަކެކެވެ.