މިނިވަންކަމާ ސިޔާދަތު ދެމެހެއްޓުމަށް ރައީސް ގެންގުޅުއްވާ ހަރުދަނާ ސިޔާސަތަށް ސާބަސް ދަންނަވަން- ރައީސް މައުމޫން

ދިވެހިރާއްޖޭގެ މިނިވަންކަމާ ސިޔާދަތު ވަރުގަދަ ކުރައްވާ ދެމެހެއްޓުމަށްޓަކައި ޢިއްޒަތްތެރި ރައީސުލްޖުމްހޫރިއްޔާ ގެންގުޅުއްވާ ހަރުދަނާ ސިޔާސަތަށް ތާޢީދުކޮށް ޝުކުރާއި ސާބަސް ދަންނަވާ ކަމަށް ކުރީގެ ރައީސް އަލްއުސްތާޛް މަޢުމޫން ޢަބްދުލް ޤައްޔޫމް ވިދާޅުވެއްޖެއެވެ. 

ނަޞްރުގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް މައުމޫން ވިދާޅުވީ 1988 ވަނަ އަހަރުގެ ނޮވެންބަރ 3 ވަނަ ދުވަހު ރާއްޖެއަށް ދެވުނު ޢުދުވާނީ ހަމަލާގައި ރާއްޖެއަށް ލިބުނު ނަސްރަކީ ﷲ ގެ ހަޟްރަތުން ލިބުނު ނަސްރެއްކަމުގައެވެ. އެދުވަހު ދިވެހިންނަށް ކުރިމަތިވި ހާލަތުގައި ދިވެހިން ދެއްކެވީ އެއްބައިވަންތަކަމާއި ހިތްވަރު އެމަނިކުފާނު ވަނީ ފާހަގަ ކުރައްވާފައެވެ. ހަމައެއާއެކު ނޮވެމްބަރު 3 ގައި ޝަހީދުވީ ހުރިހާ އެންމެންނަކީ ޤައުމުގެ މިނިވަންކަމާއި ސިޔާދަތާއި ޝަރަފަށްޓަކައި ޤުރުބާންވީ ބޭފުޅުންކަމަށް މައުމޫން ވިދާޅުވިއެވެ.

މައުމޫން ވިދާޅުވީ ޒަމާންތަކާއެކު ރާއްޖޭގެ ޤައުމީ މަސްރަޙަށް ބަދަލުތަކެއް އައިނަމަވެސް، ރާއްޖޭގެ ޤާނޫނުތަކާއި ގަވާއިދުތައް ބަދަލުވަމުންދިޔަނަމަވެސް، ރާއްޖޭގައި ސިޔާސީ ޕާޓީތަކެއް އުފެދި ހިނގަމުންދިޔަނަމަވެސް، އެއްވެސް ކަމެއްގެ ސަބަބުންވެސް މިޤައުމުގެ ވަޙުދަތަށް އެއްވެސް އުނިކަމެއް އައިސްގެން ނުވާނެ ކަމަށެވެ. 

ރައީސް މައުމޫންގެ ވަނީ ދުނިޔޭގައި ހިންގަމުންދާ ޤަތުލުޢާއްމުގައި ހަނގުރާމަކުރަމުންދާ ފަލަސްޠީނުގެ ރައްޔިތުން ތަޙައްމަލުކުރަމުންދާ އިސްރާއީލުގެ ނަސްލު ނައްތާލުމުގެ ޢަމަލު ކުށްވެރި ކުރައްވާފައެވެ. އަދި އެ ޢަމަލު ކުށްވެރި ކުރުމުގައި މިހާރުވެސް ތިބިގޮތަށް ދިވެހީން ދެމިތިބެންޖެހޭކަމަށްވެސް އެމަނިކުފާނު ވިދާޅުވިއެވެ.

ރައީސް މައުމޫނަކީ 1988 ވަނަ އަހަރު ރާއްޖެއަށް ދިވެހިންގެ ބަޔަކާއި ގުޅިގެން ބޭރުގެ ކުލީ ސިފައިންގެ ބަޔަކު ހަމަލާދިންއިރު ރާއްޖޭގެ ރައީސުލްޖުމްހޫރިއްޔާއެވެ. ކުރީގެ ރައީސް، ނިޝާން ޣާޒީގެ ޢިއްޒަތުގެ ވެރިޔާ އަލްއުސްތާޛު މައުމޫން ޢަބްދުލްޤައްޔޫމް ވަނީ 3 ނޮވެމްބަރު 1988 ވަނަ އަހަރުގެ ބިރުވެރި ޙާދިސާގެ ހަނދާން އައުކުރައްވާފައެވެ.