'ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ޚިދުމަތް 'ވަންގަވް' އަށް!

ދިވެހިރާއްޖޭގެ ޒަކާތު ހައުސްއިން ދެމުންދާ 'ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ޚިދުމަތަށް 'ވަންގަވް' މެދުވެރިކޮށް އެދެވޭނެ އިންތިޒާމް ހަމަޖައްސައިފިއެވެ.

ދިވެހި ސަރުކާރުގެ ޚިދުމަތްތައް ރައްޔިތުންނަށް އަވަސްކަމާއި ފަސޭހަކަމާއެކު އެއް ތަނަކުން ގެނެސްދިނުމަށް ފަރުމާކޮށްފައިވާ 'ވަންގަވް' ޑިޖިޓަލް ޕްލެޓްފޯމްއަށް އައުމާއެކު އާންމު ރައްޔިތުންނަށް ވަރަށްބޮޑު ލުޔެއް ލިބިގެންދާނެއެވެ. 

އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ރަސްމިއްޔާތުގައި މި ޚިދުމަތް ރަސްމީކޮށް ތަޢާރަފްކޮށްދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މި ޚިދުމަތަކީ ރައްޔިތުންނަށް ލުއިފަސޭހަކަމެއް ލިބިގެންދާނެ ޚިދުމަތަކަށް ވެގެންދާނެކަމަށާއި މި ޚިދުމަތް ތަޢާރަފްކުރުމަށް ޒަކާތު ހައުސްގެ މުވައްޒަފުންނާއި ޓްރޭޑްނެޓްގެ މުވައްޒަފުން ކުރެއްވި މަސައްކަތް ފާހަގަކުރައްވާކަމަށެވެ.

ދިވެހިރާއްޖޭގެ ޒަކާތު ހައުސްގެ ބޭސްފަރުވާގެ ޙިދުމަތް ވަންގަވްއަށް ގެނެސްފައިވަނީ ރައްޔިތުންނަށް ވީހާވެސް ލުއި ފަސޭހަކަމާއި އަވަސްކަމާއެކު ޚިދުމަތެއް އެދެވޭނެ އިންތިޒާމް ހަމަޖެއްސުމެވެ. މި ޚިދުމަތް ތަޢާރަފްކުރުމާއެކު މިއަދުން ފެށިގެން ކައުންޓަރަށް ނުވަތަ އީމެއިލް މެދުވެރިކޮށް ޒަކާތުގެ ބޭސްފަރުވާގެ އެހީއަށް އެދި ހުށައަޅާ ފޯމުތައް ބަލައިނުގަންނާނެއެވެ.