ވިޔަފާރީގެ ބޭނުމަށް ބުޅާ އެތެރެކުރުން ވަކިމުއްދަތަކަށް މަނާކުރަނީ!

ވިޔަފާރީގެ ބޭނުމަށް ބުޅާ އެތެރެކުރުން ވަކިމުއްދަތަކަށް މަނާކުރުމަށް ނިންމައިފައިވާ ކަމަށް ދަނޑުވެރިކަމާ ދިރޭތަކެއްޗާ ބެހޭ ވަޒީރު ޑރ ޢާއިޝަތު ރަމީލާ ވިދާޅުވެއްޖެއެވެ. 

ވަަޒީރު ރަމީލާ މިހެން ވިދާޅުވީ ދައުލަތުގެ ޓީވީގައި ވާހަކަފުޅު ދައްކަވަމުންނެވެ. 

އެކަމަނާ ވިދާޅުވީ ޖަނަވާރުންގެ ރައްކާތެރިކަމާ ބެހޭ ބިލް މިހާރު ޑްރާފްޓް ކޮށްފައި ވާއިރު، ޕެޓްގެ ގޮތުގައި ގެންނަ ދިރޭތަކެތި ރާއްޖެ އެތެރެކުރުން ކޮންޓްރޯލް ކުރެވޭނެ ގޮތްތަކެއް އެ ބިލްގައި ހިމަނާފައި ކަމަށެވެ. އަދި މަގުތަކުގައި އުޅޭ ހުރިހާ ބުޅާތަކެއް ބުޅާ ފެސިލިޓީއަށް ބަދަލު ކުރުމުން، ވިޔަފާރީގެ އުސޫލުން ރާއްޖެއަށް ބުޅާ އެތެރެކުރުން ވަކި މުއްދަތަކަށް މަނާކުރާނެ ކަމަށް ވަޒީރު ރަމީލާ ވިދާޅުވި އެވެ.

ވަޒީރު ރަމީލާ ވިދާޅުވީ ހުޅުމާލޭގައި ގާއިމުކޮށްފައިވާ "އޮޅު ހިޔާ" ގެ މަސައްކަތް ރަނގަޅަށް ފެށުމުން އާންމުންނަށް އެތަނުން ބުޅާ އެޑޮޕްޓްކުރަން ވެސް ކުރެވޭނެ ކަމަށެވެ. އަދި ބުޅާ އެތެރެ ކުރުމުގެ ފުރުސަތު އޮއްވާ އެޑޮޕްޝަނަށް ހުޅުވާލުމުން ބުޅާ ރާއްޖެ އެތެރެކުރާ މިންވަރު އިތުރުވާނެ ކަމަށާއި އޭގެ ސަބަބުން ގެންނަން ބޭނުންވާ ނަތީޖާ ނުނެރެވޭނެ ކަމަށް އެކަމަނާ ވިދާޅުވި އެވެ.

ޖަނަވާރުންގެ ރައްކާތެރިކަމާ ބެހޭ ބިލުގައި ވާނީ ޕެޓްގެ ގޮތުގައި ރާއްޖެއަށް އެތެރެކުރެވޭ އެއްޗެއްސަށް ކޮންޓްރޯލް މެކޭނިޒަމެއް ލާނެ ގޮތް އޮންނާނެކަމަށެވެ. ހުރިހާ ބުޅާތައް ޕެޓްކެއާ ފެސިލިޓީއަށް ނެގީމަ، ކޮންމެވެސް މުއްދަތަކަށް ވިޔަފާރީގެ އުސޫލުން ވިއްކުމަށްޓަކައި ބުޅާ އެތެރެކުރުން ހުއްޓާލުން މިހާރުގެ ޕްލޭންގައި އެބައޮތްކަމަށް ވަޒީރު ރަމީލާ ވިދާޅުވިއެވެ. 

އޭރުން ބުޅާ ޕެޓްގެ ގޮތުގައި ނަގާނީ ފެސިލިޓީން. އެކަމަކު އަމިއްލަ ފަރާތަކުން ޕެޓްގެ ގޮތުގައި ގެނައުން މައްސަލައެއް ނޫން. އެކަމަކު ވިއްކުމަށް ބުޅާ އެތެރެކުރުން ކޮންމެވެސް ވަރަކަށް ހޯލްޑް ކުރާނަން

ވަޒީރު ރަމީލާ ވިދާޅުވެފައިވެއެވެ.

ބުޅާތަކަށް ހަތަރު ފްލޯގެ ދާއިމީ އިމާރާތެއް އެޅުމުގެ މަސައްކަތް މިއަންނަ އަހަރުފަށާނެއެވެ. މިދިޔަ ހޮނިހިރު ދުވަހި ހުޅިވި އޮޅުހިޔާ އަކީ ވަގުތީ ތަނެކެވެ.ވަޒީރު ވިދާޅުވީ ހަތަރު ފްލޯގެ ދާއިމީ އިމާރާތައް މާލީ ވުޒާރާގެ ެ ހުއްދަ ވެސް ލިބިފައިވާކަމަށެވެ. އަދި ގޭގައި ބުޅާ ގެންގުޅޭ މީހުން، ދަތުރެއް ދާން ޖެހިއްޖެ ނަމަ، އެނބުރި އަންނަންދެން އޮޅުހިޔާ އިން  ބުޅާ ބަލަހައްޓައިދޭނެ ކަމަށް ވެސް ވަޒީރު ޑރ ރަމީލާ ވިދާޅުވިއެވެ.