އިސްރާއީލް އދ އިން ވަކިކުރުމަށް މެލޭޝިއާއިން ތާއީދުކޮށްފި

އިސްރާއީލުން ބައިނަލްއަޤްވާމީ ޤާނޫނާ ޚިލާފުވެފައިވާ ކަމަށް ސާބިތުވެއްޖެނަމަ، އެ ޤައުމު އދ އިން ވަކިކުރުމަށް މަގުފަހިވެދާނެ ޤަރާރެއް އެކުލަވާލުމުގައި މެލޭޝިއާ ބައިވެރިވެއްޖެއެވެ. މި މަޢުލޫމާތު ހާމަކުރެއްވީ މެލޭޝިއާގެ ބޮޑުވަޒީރު އަންވަރު އިބްރާހީމެވެ.

ހޯމަ ދުވަހު ޕާލިމަންޓުގައި ދެއްކެވި ވާހަކަފުޅުގައި އަންވަރު ވިދާޅުވީ، މި ޤަރާރުގެ ޑްރާފްޓް މިހާރު މަޝްވަރާކުރެވެމުންދާ ކަމަށާއި، އަދި ވަރަށް އަވަހަށް އދ ގެ ޖެނެރަލް އެސެމްބްލީއަށް ހުށަހެޅޭނެ ކަމަށެވެ.

މި މަސައްކަތުގައި މެލޭޝިއާއާ އެކު ބައިވެރިވާ އެހެން ޤައުމުތަކުގެ ތެރޭގައި މިޞްރު، އިންޑޮނޭޝިއާ، ނަމީބިއާ، ނޯވޭ، ޤަޠަރު އަދި ސަޢޫދީ ޢަރަބިއްޔާ ހިމެނެއެވެ. މި ގްރޫޕުން އަމާޒު ހިފާފައިވަނީ ފަލަސްޠީނުގެ އޮކިއުޕައިޑް ޓެރިޓަރީތަކުގައި ބައިނަލްއަޤްވާމީ އަދި އދ ގެ އޭޖެންސީތަކުގެ ހަރަކާތްތައް ހިންގުމަށް އިސްރާއީލުން ހުއްދަދިނުމުގެ ޒިންމާއާ ގުޅޭގޮތުން އިންޓަނޭޝަނަލް ކޯޓް އޮފް ޖަސްޓިސްގެ ލަފައެއް ހޯދުމަށެވެ.

"އިސްރާއީލުން ބައިނަލްއަޤްވާމީ ޤާނޫނާ ޚިލާފުވެފައިވާނަމަ، އދ ގެ މެންބަރުކަމުން ވަކިކުރެވިދާނެތޯ ބަލާނަން،" އަންވަރު ވިދާޅުވިއެވެ.

މި ޤަރާރަކީ ޔޫއެންއާރްޑަބްލިޔޫއޭ (UNRWA) އިން ޣައްޒާ، ވެސްޓް ބޭންކް، ޖޯޑަން، ލެބަނަން އަދި ސީރިއާގައި ދިރިއުޅޭ 6 މިލިއަނެއްހާ ފަލަސްޠީނު ރެފިއުޖީންނަށް އަސާސީ ޚިދުމަތްތައް ފޯރުކޮށްދިނުން ކުރިއަށް ގެންދިއުމަށް ޤާނޫނީ ބިންގަލެއް އެޅުމަށް މަގުފަހިކޮށްދޭނެ އެއްޗެއް ކަމަށް އަންވަރު ވިދާޅުވިއެވެ.

ފާއިތުވި ހަފްތާގެ ހޯމަ ދުވަހު އިސްރާއީލުގެ ޕާލިމަންޓުން ޔޫއެންއާރްޑަބްލިޔޫއޭ އިން ޣައްޒާ، ވެސްޓް ބޭންކް އަދި އީސްޓް ޖެރޫސަލަމްގައި މަސައްކަތްކުރުން މަނާކުރާ ޤާނޫނެއް ފާސްކުރިއެވެ. މިކަމާ ގުޅިގެން، ފަލަސްޠީނުގެ ރައްޔިތުންނަށް އެހީތެރިވުމަށް ޔޫއެންއާރްޑަބްލިޔޫއޭ އިން ކުރާ މަސައްކަތްތަކަށް މެލޭޝިއާއިން ދެމުންދާ އެހީތެރިކަން ދަމަހައްޓާނެ ކަމަށް އަންވަރު ވިދާޅުވިއެވެ.

"މެލޭޝިއާއިން ޔޫއެންއާރްޑަބްލިޔޫއޭ އަށް ދެމުންދާ އެހީތެރިކަން ވަރަށް މުހިންމު،" އަންވަރު ވިދާޅުވިއެވެ. އޭޖެންސީގެ ވެރިޔާ ފިލިޕް ލަޒަރީނީ އިން މެލޭޝިއާގެ ފޮރިން މިނިސްޓަރަށް ޝުކުރު އަދާކުރައްވާފައިވާކަމަށާއި، މި އެއްބާރުލުން އިތުރަށް ފުޅާކުރުމަށް އެދިވަޑައިގެންފައިވާ ކަމަށްވެސް އަންވަރު ފާހަގަކުރެއްވިއެވެ.

ޔޫއެންއާރްޑަބްލިޔޫއޭ އަށް ދެމުންދާ އެހީތެރިކަމާ ގުޅޭގޮތުން ޕާލިމަންޓުގައި ކުރެވުނު ސުވާލުތަކަށް ޖަވާބުދެއްވަމުން، އަންވަރު ވިދާޅުވީ މެލޭޝިއާއިން މާލީ އެހީތެރިކަން ވެސް ފޯރުކޮށްދެމުންދާ ކަމަށެވެ.

"އަޅުގަނޑުމެން ކުރިން ވާނީ 100 މިލިއަން ރިންގިޓް (23.3 މިލިއަން އެމެރިކާ ޑޮލަރު) ގެ ފައިސާގެ އެހީ ދޭނެ ކަމަށޭނެ ކަމަށް އިޢުލާނުކޮށްފައި. އަދި ޣައްޒާގެ ޚާއްޞަކޮށް ކުޑަކުދިންނާއި ބަލިމީހުން ފަރުވާއަށް ގެނެސް މިލިޓަރީ ހޮސްޕިޓަލްތަކުގައި ބަލަހައްޓަމުން ގެންދަން. މިކަން ކުރިއަށް ގެންދާނަން،" އަންވަރު ވިދާޅުވިއެވެ.

"ޔޫއެންއާރްޑަބްލިޔޫއޭ އަށް ޚާއްޞަކޮށް މިހާތަނަށް ދޫކޮށްފައިވާ ފައިސާގެ ޢަދަދަކީ 25 މިލިއަން ރިންގިޓް،" އޭނާ އިތުރަށް ވިދާޅުވިއެވެ.

އަންވަރު ވާހަކަފުޅު ނިންމަވާލެއްވީ، ޔޫއެންއާރްޑަބްލިޔޫއޭ ގެ "އަވަސް ބޭނުންތައް" ދެނެގަތުމަށާއި އެކަންކަމަށް އެޑްރެސްކުރުމަށް މެލޭޝިއާގެ ފޮރިން މިނިސްޓްރީއާއި އެ އޭޖެންސީއާ ދެމެދު މަޝްވަރާތައް ކުރިއަށްދާ ކަމަށް ވިދާޅުވެފައެވެ.