ނޮޅިވަރަމަށް މަސްތުވާތަކެތި އެތެރެކުރަން އުޅުނު މީހަކު ހައްޔަރުކޮށްފި

ހދ. ނޮޅިވަރަމަށް މަސްތުވާތަކެތި އެތެރެކުރަން އުޅުނު މީހަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން ހާމަކޮށްފައިވާ ގޮތުގައި، އެ މީހާ ހައްޔަރުކުރީ ފުލުހުންނަށް ލިބުނު އިންޓެލިޖެންސް މަޢުލޫމާތަކާ ގުޅިގެން ކުޅުދުއްފުށި ސިޓީ ޕޮލިސް ސްޓޭޝަނާއި ނޮލިވަރަމް ޕޮލިސް ސްޓޭޝަން ގުޅިގެން ކުރިޔަށް ގެންދިޔަ އޮޕަރޭޝަނެއްގައި މި މަހުގެ 29ވަނަ ދުވަހެވެ.

މި އޮޕަރޭޝަންގައި ހައްޔަރުކޮށްފައި ވަނީ ޔާދު، ހދ. ނޮޅިވަރަން، އުމުރުން 48 އަހަރުގެ ޢަލީ ރަޝީދުއެވެ.

މި އޮޕަރޭޝަނުގައި ފުލުހުން މަސްތުވާ ތަކެތި ހޯދާފައި ވަނީ ނޮޅިވަރަމަށް ދިޔަ ބޯޓަކުން ގެންދިޔަ ފޮށިގަނޑަކާއި ޑަބިޔަލެއް ބަލާފާސްކޮށްގެނެވެ. 

ފުލުހުން ހާމަކޮށްފައިވާ ގޮތުގައި، މި އޮޕަރޭޝަންގައި ވަނީ މަސްތުވާތަކެތިކަމަށް ބެލެވޭ އެއްޗެއް ހުރި 2 ޕެކެޓު ފެނިފައެވެ. ނަމަވެސް މި ތަކެތީގެ ބަރުދަން ހާމަކޮށްފައެއް ނުވެއެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.

ފުލުހުން ބުނީ މި މައްސަލަ އިތުރަށް ތަޙުޤީޤު ކުރަމުން އަންނަ ކަމަށެވެ.