"ހިޔާވެހި" ސްކީމްގެ ދަށުން ދަތިހާލުގައި އުޅޭ ވަރަށްގިނަ އާއިލާތަކަކަށް ގެދޮރުގެ ތަނަވަސްކަން ލިބިގެންދާނެ- ޑރ. ޢަލީ ހައިދަރު

މިއަދު ތަޢާރަފްކުރެވިގެންދިޔަ "ހިޔާވެހި ފައިނޭންސް ސްކީމް"ގެ ދަށުން މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށްގިނަ އާއިލާތަކަކަށް ގެ ދޮރުގެ ތަނަވަސްކަން ލިބިގެންދާނެކަމަށް ގަބޫލުކުރައްވާކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާއި ބެހޭ ވަޒީރު ޑރ. ޢަލީ ހައިދަރު އަޙްމަދު ވިދާޅުވެއްޖެއެވެ.

 "ހިޔާވެހި ފައިނޭންސް ސްކީމް" އިފްތިތާޙް ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ވަޒީރު ވިދާޅުވީ މި ސްކީމްގެ ސަބަބުން ބޯހިޔާވަހިކަމެއް ހޯދަން ހުރަސް އެޅިފައިވާ އެތައް އާއިލާއަކަށް މިކަމުން ފުރުސަތު ހުޅުވިގެން ދާނޭ ކަމަށެވެ. އަދި މިއީ ބޯހިޔާވަހިކަމެއް ހޯދަން އެތައް އާއިލާއަކަށް ދެވޭ އުންމިދެއް ކަމުގައެ އެވެ. މި ލޯން ސްކީމްގެ ދަށުން އަލަށް ގެދޮރު ހެދުމުގެ އިތުރަށް ހަދަން ފަށާ ނުނިމި ހުރި ގޭގެ ނިންމަން ވެސް އަދި ބާވެ އަލުން ހަދަން ޖެހޭ ގޭގެ ހަދަން ވެސް ލޯނު ދޫކުރަން ވަނީ ނިންމައިފަ އެވެ. 

ވަޒީރު އިތުރަށް ވިދާޅުވީ ރާއްޖޭގައި ބޯހިޔާވަހިކަމެއް ލިބިފައިނުވާ އެންމެނަށް އެކަށީގެންވާ ބޯހިޔާވަހިކަމެއް ހޯދައިދިނުމަކީ ރައީސުލްޖުމްހޫރިއްޔާގެ އެންމެ ބޮޑު އިސްކަމެއް ދެއްވާ އެއް ވަޢުދުފުޅުކަމަށެވެ. އަދި މިއީ ރާއްޖޭގެ އެކި ރަށްރަށުގައި ގެދޮރުނޭޅި ފަޅަށްހުރި ގޯތިތަކުގައި ގެދޮރު އިމާރާތްކުރުމަށް %5 ގެ ސާރވިސް ޗާޖެއްގައި ފައިސާ ދޫކުރުމަށް އެކުލަވާލާފައިވާ ސްކީމެއް ކަމަށް ވަޒީރު ވިދާޅުވިއެވެ.

މި ސްކީމްގައި ހިމެނޭ ވަސީލަތްތަކުގެ އެހީގައި މާލީ ތަނަވަސްކަން ނެތުމުގެ ސަބަބުން ދަތިހާލުގައި އުޅޭ ވަރަށްގިނަ އާއިލާތަކަކަށް ގެދޮރުގެ ތަނަވަސްކަން ލިބިގެންދާނެކަމަށް ގަބޫލުކުރަން

ވަޒީރު ވިދާޅުވިއެވެ.

 ވަޒީރު އިތުރަށް ވިދާޅުވީ މި ސްކީމަށް އެދޭ ފަރާތަކީ ސަރުކާރުގެ ބޯހިޔާވަހިކަމުގެ ދަށުން ފްލެޓެއް ނުވަތަ ހައުސިން ޔުނިޓެއް ފަދަ ބޯހިޔާވަހިކަމެއް ހުރި ފަރާތަކަށް ވެގެން ނުވާނޭ ކަމަށެވެ. އަދި މި ލޯނު ދޫކުރާނީ ފުރަތަމަ ބޯހިޔާވަހިކަމެއް ހޯދަން ބޭނުންވާ ފަރާތްތަކަށް ކަމަށް ވެސް މިނިސްޓަރު ވިދާޅުވި އެވެ.

"ހިޔާވަހި ފައިނޭންސް ސްކީމް" ގައި ހިމެނޭ ވަސީލަތްތަކަށް ޝަރުޠު ހަމަވަ ފަރާތްތަކަށް ހިޔާވެހި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު މި ހަފްތާގެ ތެރޭގައި ހުޅުވާލެވޭނެކަމަށް ގެދޮރުވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.