ޑޮމައިންތަކުގެ ހުއްދަ އައުކުރުމުގެ ފުރުސަތު މިމަހުގެ 17 ގައި ހުޅުވާލަނީ

މިހާތަނަށް ދޫކޮށްފައިވާ ޑޮމައިންތަކުގެ ރަޖިސްޓްރީ އަލުން ދޫކުރާގޮތަށް ނިންމައި، ހުރިހާ ޑޮމައިންތައް އައުކުރުމުގެ ފުރުސަތު މިމަހުގެ 17 ވަނަ ދުވަހު ހުޅުވާލާނެކަމަށް ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވިދާޅުވީ މިއީ ރާއްޖޭގައި ބޭނުންކުރާ ޑޮމައިންގެ ސައްޙަކަށް ކަށަވަރުކޮށް، ޑޮމައިން ބޭނުންކުރާ ފަރާތްތަކަށް ރައްކާތެރިކަން ކަށަވަރުކުރުމަށް ފަށާ މަސައްކަތެއްކަމަށެވެ. ޑޮމައިން ވިއްކުމުގެ ކަންކަން މީގެ ކުރިން މިނިސްޓްރީން ކުރިއަށްގެންދިޔަ ނަމަވެސް މީގެ ފަހުން ޑޮމައިން ވިއްކުން ކުރިއަށްގެންދާނީ ބީލަމުގެ އުސޫލުން ކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ 60 ދުވަހުގެ ތެރޭގައި އެ ހުރިހާ ލިޔެކިޔުންތައް ވެރިފައިކުރުމަށް ހުޅުވާލާނެ ކަމަށާއި އޭގެ ފަހުގައި އައު ސެކިއުރިޓި ފީޗަރއާއެކު ޑޮމައިން ރެޖިސްޓްރީ އަދި ބޭނުންކުރުމުގެ ހުއްދަ ދޫކުރެވޭނެ ކަމުގައެވެ. އަދި މިއީ ޑޮމައިންގެ ސައްޙަކަން ކަށަވަރުކުރެވޭނެ މުހިންމު މަސައްކަތެއް ކަމަށާއި، ހުށައަޅާތާ 60 ދުވަހަށް ފަހު ޤަބޫލުކުރާނީ އާ ލިޔެކިޔުންކަމަށް ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވިއެވެ.

މިނިސްޓަރު ވިދާޅުވީ މިހާތަނަށް ޑޮމައިން ވިއްކުމުގެ އުސޫލު ކުރިއަށްގެންގޮސްފައި ހުރީ އުސޫލާ ހިލާފަށް ކަމަށާއި، ބައެއް ޑޮމައިންތައް ދޫކުރި މީހުންގެ ނަންވެސް އިދާރާގެ ރެކޯޑްތަކުގައި ނެތްކަމަށެވެ.

ރާއްޖޭގައި ބޭނުންކުރަމުންދާ ވެހިކަލްތަކުގެ ޑޮމައިން ނަމްބަރުތަކުގެ ތެރެއިން 700 އެއްހާ ޑޮމައިން ނަމްބަރުގެ އަސްލު ނޭނގޭ ކަމަށް ވަޒީރު ވަނީ މީގެ ކުރިން ވިދާޅުވެފައެވެ. ރާއްޖޭގައި 1200 އެއްހާ ޑޮމައިން ނަންބަރު ގެންގުޅޭކަމަށް ޓްރާންސްޕޯޓް މިނިސްޓްރީން ލަފާކުރެއެވެ. ވަޒީރު ވިދާޅުވީ އައު އުސޫލުތަކާއެކު ގެންނަ ބަދަލާއެކު، ޑޮމައިންއަށް ދޭންވޭ ރައްކާތެރިކަން ވަރަށް ބޮޑަށް ލިބިގެންދާނެކަމަށެވެ.