ކުޅުދުއްފުށީ ސިޓީއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ނައިބު ރައީސް މާލެ ވަޑައިގެންފި

ކުޅުދުއްފުށީ ސިޓީއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަޠީފް މާލެ ވަޑައިގަންނަވައިފިއެވެ.

ނައިބު ރައީސްގެ މި ދަތުރުފުޅަކީ ދުޅަހެޔޮ މުޖުތަމަޢެއް ބިނާކުރުމަށް "ހަށިހެޔޮ ރާއްޖެ" މި ޕްރޮގްރާމް އިފްތިތާޙުކޮށްދެއްވުމަށް ކުރެއްވި ރަސްމީ ދަތުރުފުޅެކެވެ. "ހަށިހެޔޮ ރާއްޖެ" އަކީ ސްޕޯޓްސް ކައުންސިލަރސް އަދި ޔޫތް އެސޯސިއޭޓުން ތަމްރީނުކުރުމަށް މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން އިސްނަންގަވައިގެން ކުރިއަށްގެންދާ ހަރަކާތެކެވެ.

އިއްޔެ ކުޅުދުއްފުށީ ސިޓީގައި އިފްތިތާޙުކުރެއްވި ޕްރޮގްރާމަކީ މި ސަރުކާރުގެ ހަފުތާ 14ގެ ވަޢުދުތަކުގައި ހިމެނޭ، މޮޅެތި އެތުލީޓުން އުފެއްދުމާބެހޭ ދިގު ރާސްތާގެ ޕްރޮގްރާމް ފަރުމާކުރުމުގެ ސިޔާސަތުގެ ތެރެގައި ހިމެނޭ ކަމެކެވެ. އަދި މިކަމަކީ މީހުން ބިނާކުރުމާއި ތަމްރީނުކުރުމަކީ ޤައުމުގެ ކުރިމަގު އުޖާލާކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ހަރުދަނާ ސިޔާސަތުތަކުގެ ތެރޭގައިވެސް ހިމެނޭކަމެކެވެ.