ޙައްޖު ކޯޕަރޭޝަނުން ހަލާލް ޓޫރިޒަމް ތަޢާރަފްކޮށް މާފުށީގައި ސިޓީ ހޮޓަލެއް ތަރައްޤީ ކުރަނީ

އާމްދަނީ އިތުރުކުރުމުގެ ގޮތުން މޯލްޑިވްސް ޙައްޖު ކޯޕަރޭޝަނުން ކ. މާފުށީގައި ސިޓީ ހޮޓަލެއް އެޅުމަށް ނިންމާފައިވާކަމަށް އެ ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން ޝަކީލް ވިދާޅުވީ "ހަލާލް ޓޫރިޒަމް" އަށް އިންވެސްޓު ކުރަން ނިންމާފައިވާކަމަށެވެ. ސަބަބަކީ އެ ކުންފުނިން އިންވެސްޓު ކުރެވިދާނެ ރިސްކު ކުޑަ ވިޔަފާރިތައް ބެލުމުން ފާހަގަވީ ރިއަލް އެސްޓޭޓް ދާއިރާ ކަމަށް އޭނާ ވިދާޅުވި އެވެ. 

ޝަކީލް ވިދާޅުވީ ހުޅުމާލޭގައި ލަގްޒަރީ އެޕާޓްމެންޓް އަޅައިގެން ވިއްކުމަށް ނިންމާފައިވާ ކަމަށާއި ކުރިއަށް އޮތް ދެތިން މަސް ތެރޭގައި ބަޔަކާ ހަވާލުކޮށް އިމާރާތް ކުރުމުގެ އަމަލީ މަސައްކަތް ފަށާނެ ކަމަށެވެ. ބޭނުމަކީ ޙައްޖަށް ދާމީހުންގެ އަތުން ވީހާވެސް ކުޑަ ފީއެއް ނެގުން ކަން ޝަކީލް ފާހަގަ ކުރެއްވިއެވެ. 

މީގެ އިތުރުން ޙައްޖު ކޯޕަރޭޝަނަކީ ބޭރު ފައިސާއިން މުޢާމަލާތުކުރަންޖެހޭ ކުންފުންޏަކަށްވާއިރު، ބޭރު ފައިސާއިން އާމްދަނީ ލިބޭނެ ގޮތްތައް ހޯދުމަށް މާފުށީގައި ސިޓީ ހޮޓަލެއް ތަރައްޤީކުރުމަށް ނިންމާފައިވާ ކަމަށާއި އެކަމަށް ބޭނުންވާ ބިން މިހާރު ހަމަޖެހިފައިވާކަމަށް މުޙައްމަދު ޝަކީލް ވިދާޅުވިއެވެ.

ޙައްޖު ކޯޕަރޭޝަނުން މިހާރު މީހުން ޙައްޖަށް ގެންދަނީ 69,965 ރުފިޔާއަށެވެ.އެ ކޯޕަރޭޝަންގެ އަމާޒަކީ ޙައްޖަށްދާ މީހުންގެ އަތުން ނަގާ އަގު، 50،000 ރުފިޔާއަށް ކުޑަ ކުރުމެވެ.