މާލޭގައި އަންހެނަކު ރަހީނުކުރި މައްސަަލައެއް ފުލުހުން ބަލަނީ

މާލޭގައި 18 އަހަރުގެ އަންހެނަކު ގަދަކަމުން ހިފަހައްޓައި ޖިސްމާނީ އަނިޔާކުރި ކަމަށް ތުހުމަތުކުރެވޭ ސީރިއަސް މައްސަލައެއް ފުލުހުން ތަޙްޤީގުކުރަން ފަށައިފިއެވެ. 

މިކަމާ ގުޅިގެން ފުލުހުންގެ ޚިދުމަތުން ވިދާޅުވީ، މާފަންނުގެ ގެއެއްގައި މިކަން ހިނގާފައިވާ ކަމަށާއި، މިރޭ އިރުއޮއްސި 06:11 އެހާކަށްހާއިރު މި މައްސަލަ ފުލުހުންނަށް ރިޕޯޓްކޮށްފައިވާ ކަމަށެވެ.

ފުލުހުންގެ ޚިދުމަތުން ހާމަކުރެއްވި ގޮތުގައި، މި މައްސަލައަކީ 18 އަހަރުގެ އަންހެނަކު ހުއްދަނޫން ގޮތުގައި ގަދަކަމުން ހިފަހައްޓައި އަދި އޭނާއަށް ޖިސްމާނީ އަނިޔާކޮށްފައިވާ ކަމަށް ތުހުމަތުކުރެވޭ މައްސަލައެކެވެ. މި މައްސަލަ ރިޕޯޓްކުރުމާއެކު ފުލުހުން ވަނީ އެ ސަރަހައްދަށް ގޮސް، މައްސަލަ ތަޙްޤީގުކުރުމުގެ މަސައްކަތް ވަގުތުން ފަށާފައެވެ.

މި މައްސަލަ ފުލުހުން ގެންދަނީ ވަރަށް ސީރިއަސްކޮށް ބަލަމުންނެވެ. މިފަދަ އަނިޔާގެ މައްސަލައެއް ފެންމަތިވިއިރު، މިމަހުގެ 16 ވަނަ ދުވަހުވެސް އުމުރުން 24 އަހަރުގެ ދިވެހި އަންހެނަކަށް ޖިންސީ ގޯނާކުރިކަމަށް ތުހުމަތުކުރެވޭ މައްސަލައެއް ފުލުހުން ގެންދަނީ ތަޙުޤީޤު ކުރަމުންނެވެ. ފުލުހުން ވިދާޅުވީ، މާފަންނުގެ ގެއެއްގައި ހިނގި މި މައްސަލައާ ގުޅޭ އިތުރު މައުލޫމާތު ތަޙްޤީގަށް ފަހުން ހާމަކުރާނެ ކަމަށެވެ.