އިންޑިޔާގެ ބޭންކަކުން 8 ލައްކަ ޑޮލަރުގެ ފޭރުމެއް ހިންގި 3 މީހަކު އަތުލައިގެންފި!

އިންޑިޔާގެ ބޭންކަކުން 70 މިލިޔަން ރުޕީޒް (8 ލައްކަ ޑޮލަރު)ގެ ފައިސާ ފޭރުނު 3 މީހަކު އަތުލައިގެންފިއެވެ.

އިންޑިޔާގެ ސެންޓްރަލް ބޭންކުގެ އޮފިޝަލުންގެ ހެދުން އަޅައި، ފައިސާ އުފުލަމުންދިޔަ އެ ބޭންކުގެ ވޭނަކުން 70 މިލިޔަން އިންޑިޔާ ރުޕީޒް ފޭރިގަތް މައްސަލައިގައި 3 މީހަކު ހައްޔަރުކޮށްފައިވަނީ އިއްޔެއެވެ. ބެންގަލޫރު ޕުލުސް އިދާރާއިން އިއްޔެ ހާމަކުރި ގޮތުގައި، 3 ދުވަސް ކުރީން ފޭރިގަތް 70 މިލިޔަން ރުޕީޒްގެ ތެރެއިން 57.6 މިލިޔަން ރުޕީޒް އަނބުރާ ހޯދައި، ފޭރުމުގެ ޢަމަލުގައި ބައިވެރިވި 3 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. 

"އަޅުގަނޑުމެންގެ ތަޙުޤީޤު ކުރިއަށް އެބަދޭ، ބާކީ އޮތް މިންވަރު ހޯދުމަށްޓަކައި." ބެންގަލޫރު ޕޮލިސް ކޮމިޝަނަރ ކުމާރް ސިންހު ވިދާޅުވިއެވެ. ސިންހު އިތުރަށް ވިދާޅުވީ، މި ޢަމަލުގައި ބައިވެރިވި އިތުރު މީހުން ތިބި ކަމަށާއި، އެ މީހުން ހޯދުމުގެ މަސައްކަތް މިހާރު ކުރެވެމުން ދާ ކަމަށެވެ.

މި މައްސަލައިގައި ބެންގަލޫރު ފުލުހުން ހައްޔަރުކޮށްފައިވާ 3 މީހުންނަކީ، ގޯޕަލް ޕްރަސަދް (ފައިސާ ނަޤުލުކުރާ ކުންފުނި ސީ.އެމް.އެސް.ގެ މުވައްޒަފެއް)، ޖޭ. ޒޭވިއަރ (ކުރީން ސީ.އެމް.އެސް.ގައި މަސައްކަތްކޮށްފައިވާ މީހެއް)، އަދި އަނަޕާ ނާއިކް (ޕޮލިސް ކޮންސްޓެބަލްއެއް) މިއެވެ.
 
ފޭރުމުގެ މި ޢަމަލު ހިންގާފައިވަނީ، އަލިގަދަ ދުވާލުގެ ވަޤުތުގައި، ބެންގަލޫރުގެ ލާލްބާޣު ސަރަޙައްދުގައެވެ.