"ފިއުޗަރ-ރެޑީ ޔޫތް ޕްރޮގްރާމް"ގެ ދަށުން 1000 ޒުވާނުންނަށް ތަމްރީނުވުމުގެ ފުރުސަތު!

މޯލްޑިވިސް އެންހޭންސިންގ އެމްޕްލޮޔަބިލިޓީ އެންޑް ރެޒިލިއަންސް އޮފް ޔޫތް (މީރީ) ޕްރޮޖެކްޓްގެ ފަރާތުން ކުރިއަށްގެންދިޔުމަށް ހަމަޖެހިފައިވާ "ފިއުޗަރ-ރެޑީ ޔޫތް ޕްރޮގްރާމް ޔޫތް" ޕްރޮގްރާމް އިފްތިތާޙްކޮށްފިއެވެ.

މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާއިން ވިދާޅުވީ މިއަދު އިފްތިތާޙްކުރެވުނު "ފިއުޗަރ-ރެޑީ ޔޫތް"  ޕްރޮގްރާމަކީ މީރީ ޕްރޮޖެކްޓްގެ އެއްބާރުލުމާއިއެކު، މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް އިން އިންތިޒާމްކޮއްގެން ކުރިއަށް ގެންދިޔުމަށް ހަމަޖެހިފައިވާ ތަމްރީން ޕްރޮގްރާމެއް ކަމަށެވެ.

އެގޮތުން މި ޕްރޮގްރާމްގެ ދަށުން،ރާއްޖެއަށް ބޭނުންވާ މުހިންމު އެކި ދާއިރާތަކުގެ ތެރޭގައި ހިމެނޭ ފަތުރުވެރިކަން، އިމާރާތްކުރުން، އައިސީޓީ، މަސްވެރިކަން އަދި ދަނޑުވެރިކަން ފަދަ ދާއިރާތަކުން ނެޝަނަލް ސެޓްފިކެޓް ލެވެލް 3 ގެ 30 ކޯހެއް ކުރިއަށްގެންދިޔުމަށް ހަމަޖެހިފައިވާ ކަމަށް އެ ވުޒާރާއިން މަޢުލޫމާތުދެއެވެ. 

މި ޕްރޮގްރާމަކީ 16 އަހަރާއި 35 އަހަރާއި ދެމެދުގެ ޒުވާނުންނަށް ޙާއްސަކޮށް ކުރިއަށްގެންދާ މި ޕްރޮގްރާމެއް ކަމަށާއި މި ޕްރޮގްރާމްގެ ދަށުން 1،000 ޒުވާނުންނަށް ތަމްރީނުވުމުގެ ފުރުޞަތު ހުޅުވާލެވިފައިވާކަމަށްވެސް އެވުޒާރާއިން ވިދާޅުވެފައި ވެއެވެ. 

ދިވެހިރާއްޖެއަށް އެންމެ ބޭނުންވާ ދާއިރާތަށް ދެނެގަނެ، އެ ދާއިރާތަކުން ޒުވާނުން ތަމްރީނުކުރުމަކީ ރައީސުލްޖުމްޙޫރިއްޔާ ޑރ.މުޙައްމަދު މުއިޢްޒުގެ ވަޢުދުފުޅުތަކުގެ ތެރޭގައި ހިމެނޭ، ސަރުކާރުން ވަރަށް ބޮޑު އަހަމިއްޔަތެއް ދެއްވާ ސިޔާސަތެކެވެ.