ކުޅިވަރު
ހޮޅުދޫ ފުޓްސަލް މުބާރާތް: އެންމެ ފަހުން ކައުންސިލް ބަލިކޮށް ފެނަކައިން ތަށި އުފުލާލައިފި
ފެނަކަ ހޮޅުދޫ ބްރާންޗުން ހޮޅުދޫ އިންޓަރ އޮފީސް ފުޓްސަލް މުބާރާތް 2025ގެ ތަށި އުފުލާލުން---
ހޮޅުދޫ އިންޓަރ އޮފީސް ފުޓްސަލް މުބާރާތް 2025ގެ ފައިނަލު މެޗުގައި، ހޮޅުދޫ ކައުންސިލް ބަލިނުކުރެވި އޮތް އޮތުން ނިމުމަކަށް ގެނަސް، 7-4އިން އެ ޓީމު ބަލިކޮށް ފެނަކަ ހޮޅުދޫ ބްރާންޗުން ތަށި އުފުލާލައިފިއެވެ. މިއީ ފެނަކައިން މި މުބާރާތް ކާމިޔާބުކުރި ފުރަތަމަ ފަހަރެވެ.
މުބާރާތުގެ ފައިނަލް މެޗާއި ހަމައަށް ކައުންސިލާއި އެންމެ ވާދަވެރި ޓީމެއްގެ ގޮތުގައި ފެނަކަ ފެނުނަސް، އެ ޓީމަށް ކައުންސިލްގެ މައްޗަށް ކުރި ހޯދިފައެއް ނެތެވެ. އެގޮތުން މިދިޔަ އަހަރު މި މުބާރާތުގެ ގްރޫޕް ސްޓޭޖުގައި 5-4އިން ފެނަކައިގެ މައްޗަށް ކައުންސިލުން ކުރި ހޯދިއިރު، ފައިނަލު މެޗު އެ ޓީމުން ކާމިޔާބުކުރީ 4-3އިންނެވެ.
އޭގެ ފަހުން، މި އަހަރުގެ މުބާރާތުގެ ގްރޫޕް ސްޓޭޖުގައި ދެ ބުރު ކުޅުނުއިރު، އެ ދެ މެޗުން ވެސް ފެނަކައަށް ލިބުނީ ނާކާމިޔާބެވެ. ފުރަތަމަ މެޗު 2-1އިން ކައުންސިލުން ކާމިޔާބު ކުރުމަށްފަހު ދެވަނަ މެޗުގައި ނިކުމެ އެ ޓީމުން ވަނީ 5-0ގެ ބޮޑު ތަފާތަކުން ފެނަކަ ބަލިކޮށްފައެވެ.
އެހެންނަމަވެސް، ފައިނަލް މެޗުގެ ނަތީޖާއާއެކު، އެ ހުރިހާ ހިތި ހަނދާނެއް ފެނަކައިން ފިލުވާލައިފިއެވެ. ތާރީޙު ބަދަލުކޮށް މުބާރާތް ކާމިޔާބުކޮށްފިއެވެ.
ފައިނަލު މެޗުގައި ފުރަތަމަ ލީޑު ނެގީ ވެސް ފެނަކައިންނެވެ. އެއަށްފަހު ކައުންސިލަށް ގޯލެއް ކާމިޔާބު ނުކުރެވެނީސް އެ ޓީމުން ވަނީ ލީޑު ފުޅާކޮށްފައެވެ. ނަމަވެސް މެޗުގެ ފުރަތަމަ ހާފު ނިމުމުގެ ކުރިން ކައުންސިލުން ގޯލެއް ކާމިޔާބުކޮށް އުއްމީދު ހޯދިއެވެ.
ދެވަނަ ހާފުގެ ބޮޑު ބައިގައި ފެނަކައިން ކުޅުނީ ދެ ގޯލުގެ ލީޑެއްގައި އޮވެގެނެވެ. މި މެޗުގެ އޮއެވަރު ބަދަލުކޮށް ކައުންސިލުން ލީޑު ނަގާނެ އެއްވެސް ފުރުސަތެއް އެ ޓީމުން ދީފައެއް ނުވެއެވެ. އެ ޓީމުން 3 ގޯލުގެ ލީޑެއް ނެގީ މެޗު ނިމެން ކައިރިވެފައި ވަނިކޮށެވެ.
ފައިނަލް މެޗުގައި ފެނަކައިގެ މަޙްފޫޒް ވަނީ ހެޓްރިކެއް ހަދާފައެވެ. އަދި އެ ޓީމުގެ ޙަސަން ދެ ގޯލު ކާމިޔާބުކުރިއިރު، ޠާއިފް އާއި އަޒްހަދު ވަނީ ގޯލެއް ކާމިޔާބުކޮށްފައެވެ.
ކައުންސިލްގެ ގޯލުތައް ކާމިޔާބުކުރީ ޝިނާއު، ޙާމިދު، އިރުޝާދު އަދި ޝަރީފްއެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވުނީ ފެނަކައިގެ ގޯލް ކީޕަރު ޝާފިއުއެވެ. އަދި މުބާރާތުގެ "ކިންގް"ގެ ޝަރަފު ހޯދީ އެ ޓީމުގެ އަބްދުލް ވަދޫދުއެވެ.
މިއީ ހޮޅުދޫ ފިޓްނަސް އެންޑް ރެކްރިއޭޝަން ސެންޓަރުން ބާއްވާ މުބާރާތެކެވެ. އަދި މިއީ ޖެހިޖެހިގެން މި މުބާރާތް ބޭއްވި ދެވަނަ އަހަރެވެ.