Ads by Stelco

ޚަބަރު

ލަންކާއަށް އެހީވުމަށް، ދައުލަތުގެ މީޑިޔާއިން އިސްނަގައިގެން ޓެލެތޯނެއް ކުރިއަށް ގެންދަނީ

ލަންކާއަށް އެހީވުމަށް، ދައުލަތުގެ މީޑިޔާއިން އިސްނަގައިގެން ޓެލެތޯނެއް ކުރިއަށް ގެންދަނީ

ލަންކާއަށް ކުރިމަތިވަމުންދާ ނުރައްކާތެރި މޫސުމީ ޙާލަތު.

farudhun logo

ފަރުދުން

29 ނޮވެމްބަރު 2025، 02:41

29 ނޮވެމްބަރު 2025، 02:41

ޒަމާނުއްސުރެ ރާއްޖެއާ އެންމެ ގާތް ގުޅުމެއް އޮންނަ އެއް ޤައުމު ކަމުގައިވާ އަވައްޓެރި ސްރީލަންކާއަށް "ދިތުވާއާ" ޠޫފާނުގެ ސަބަބުން ކުރިމަތިވަމުންދާ ގަދަ ވިއްސާރައިގައި ލިބެމުންދާ ބޮޑެތި ގެއްލުންތަކާ ގުޅިގެން، އެ ޤައުމަށް އެހީތެރިކަން ފޯރުކޮށްދިނުމަށް ޚާއްޞަ ޓެލެތޯނެއް ކުރިއަށް ގެންދިޔުމަށް ދައުލަތުގެ މީޑިޔާ. ޕީ.އެސް.އެމް.އިން ނިންމައިފިއެވެ.

ލަންކާއަކީ އެކި ބޭނުންތަކުގައި ދިވެހީން ގިނަގިނައިން ޒިޔާރަތްކުރާ ޤައުމަކަށް ވާއިރު، ދިގު މުއްދަތަކަށް އެ ޤައުމުގައި ދިރިއުޅުމަށް ވެސް ގިނަ ޢަދަދެއްގެ ދިވެހީން ވަނީ ލަންކާއަށް ހިޖުރަކޮށްފައެވެ.

ލަންކާއަށް މިހާރު ކުރިމަތިވަމުންދާ މޫސުމީ ޙާލަތުގެ ސަބަބުން، އެ ޤައުމުގެ ބޮޑު ބައެއްގައި ފެންބޮޑުވެ، ވަރަަށް ގިނަ ސަރަޙައްދުތަކުން ބިން ކަނޑަކަނޑައިގެން ދިޔުމުގެ ސަބަބުން ދަތުރުފަތުރުކުރުމަށް ގިނަ ހުރަސްތަކެއް ކުރިމަތިވެ، އެތައް ބަޔަކު މަރުވެފައިވާއިރު، އެ ޤައުމަށް އެހީތެރިކަން ފޯރުކޮށްދިނުމުގެ މަސައްކަތް ބައިނަލްއަޤުވާމީ ޖަމްޢިއްޔާތަކުން އަންނަނީ ކުރަމުންނެވެ. މި ގޮތުން، ސްރީލަންކާއަށް އެހީވުމަށްޓަކައި، 30 ނޮވެންބަރު 2025 ވާ އާދީއްތަ ދުވަހުގެ (މާދަމާގެ) ހެނދުނު 9:00އިން ފެށިގެން މެންދަމު 1:00އާ ހަމައަށް، ޚާއްޞަ ޓެލެތޯނެއް ކުރިއަށް ގެންދިޔުމަށް ރާއްޖޭގެ ޕީ.އެސް.އެމް. ނިއުސްއިން ވަނީ ނިންމާފައެވެ.

ޕީ.އެސް.އެމް.އިން އިސްނަގައިގެން ކުރިއަށްގެންދާ މި ޓެލެތޯނުގައި ބައިވެރިވުމަށް ރާއްޖޭގެ ހުރިހާ ނޫސްތަކާއި ޓީވީތަކަށް އެ މީޑިޔާއިން ދަޢުވަތު އަރުވާފައިވެއެވެ. އަދި ޢާންމުންނާއި، ޖަމްޢިއްޔާ ޖަމާޢަތްތަކާއި، އޮފީސްތައް ފަދަ ހުރިހާ ތަނަކަށް ވެސް މި ޓެލެތޯނުގައި ބައިވެރިވެވޭނެއެވެ. 

ޒަމާނުއްސުރެ ރާއްޖެއާ ގާތް ގުޅުމެއް އޮންނަ ސްރީލަންކާގެ ރައްޔިތުންނަކީ ވެސް، ސަޤާފީ ގޮތުން ދިވެހީންނާ ނުހަނު އެއްގޮތް ބައެކެވެ. އަދި ގިނަ ޢަދަދެެއްގެ ދިވެހީން ލަންކާގައި ދިރިއުޅޭ ފަދައިން، ލަންކާއަށް ނިސްބަތްވާ އެތައް ބަޔަކު ރާއްޖޭގައި ވަޒީފާ އަދާކުރަމުންދެއެވެ.

ދިވެހި ސަރުކާރުން ވަނީ، ލަންކާއަށް އެހީތެރިވުމުގެ ގޮތުން 50،000 އެމެރިކާ ޑޮލަރާއި، 25،000 މަސްދަޅު ހަދިޔާކުރުމަށް ނިންމާފައެވެ.

Ads by MSS

މި ލިޔުން ކިޔާލުމުން