ފަތުރުވެރިން އަމިއްލަ ބޭނުމަށް ގެންނަ ބައެއް ތަކެތިން ޑިއުޓީ މާފުވާގޮތަށް އުޞޫލު އިސްލާޙުކޮށްފި

ޓޫރިސްޓުންގެ ގޮތުގައި ރާއްޖެ އަންނަ ފަރާތްތަކަށް އަމިއްލަ ބޭނުމަށް ގެންނަ ބައެއް ތަކެތިން ޑިއުޓީ މާފުވާގޮތަށް އުޞޫލު އިސްލާޙުކޮށްފިއެވެ.

ދުންފަތް ނުވަތަ ނިކޮޓިން އެކުލެވޭ ބާވަތްތަކާއި އެފަދަ ތަކެތި ބުއިމަށް ބޭނުންކުރާ އާލާތްތަކުން ޑިއުޓީ އިނާޔަތް ދިނުން ހުއްޓާލުމަށް ނިންމި ނިންމުމާއެކު، ރާއްޖޭން ބޭރުން އަންނަ ދަތުރުވެރިން ގެންނަ ނިކޮޓިން އެކުލެވޭ ބާވަތްތަައް ކަސްޓަމްސްއަށް ޑިކްލެއާ ކުރަން ޖެހޭ ގޮތަށް ވަނީ އުސޫލު ބަދަލުވެފަ އެވެ. އެ އުސޫލުގައި ވާގޮތުން، ފަތުރުވެރިއަކަށް ރާއްޖެ އަންނައިރު ގެނެވޭނީ 19 ސިނގިރޭޓު ހިމެނޭ ފޮއްޓެވެ. 19 ސިނގިރެޓަށް ވުރެ އިތުރަށް ހިމެނޭ ނަމަ ކަސްޓަމްސް އިން އެ ތަކެތި ހިފަހައްޓާނެއެވެ. 

އެހެންނަމަވެސް އެ ނިންމުން ބަދަލުކޮށް އަލުން އެކުލަވާލި އުސޫލުގައި ވަނީ  ފަތުރުވެރިއަކަށް ރާއްޖެ އަންނައިރު އަމިއްލަ ބޭނުމަށް ގެންނަ ސިނގިރޭޓާއި ސުއްޓާފަދަ ތަކެތީގެ ތެރެއިން 200 ސިނގިރޭޓް ނުވަތަ 25 ސުއްޓާ ނުވަތަ 250 ގްރާމުގެ ދުންފަތް ހިމެނޭހެން މިއިން ކޮންމެ އެއްޗަކަށް ކަނޑައަޅާފައިވާ މިންވަރަށްވުރެ އިތުރުނުވާނަމަ ޑިއުޓީ މާފުކުރެވޭނެކަމަށެވެ.

މި މަހުގެ 1 އިން ފެށިގެން ސިނގިރޭޓާއި ބިޑިން ނަގާ ޓެކްސް ބޮޑުކޮށް، އެ ތަކެތިން ނަގާ އިމްޕޯޓު ޑިއުޓީ ވެސް ބޮޑު ކުރުމަށް އިމްޕޯޓު އެކްސްޕޯޓުގެ ޤާނޫނަށް ރައީސުލްޖުމްހޫރިއްޔާ ވަނީ ބަދަލު ގެންނަވާފައެވެ. މީގެ އިތުރުން، ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން މި މަހުގެ 15 އިން ފެށިގެން މަނާކުރުމަށްވެސް ވަނީ ނިންމާފައެވެ.