އަރބަން ސެންޓަރުތައް ކަނޑައެޅިގޮތާއި މެދުވެސް ފައްޔާޒުގެ ފާޑުކިޔުން!

އާބަން ސެންޓަރުތަކުގެ ގޮތުގައި ހަތް ރަށެއް ރައީސް ކަނޑައަޅުއްވައި،އެ ރަށްތައް ވަނީ އިއުލާނުކޮށްފަ އެވެ. އަރބަން ސެންޓަރުތައް ކަނޑައެޅިގޮތާއި މެދު އިދިކޮޅު އެމްޑީޕީގެ ޗެއަރ ޕަރސަން ފައްޔާޒު އިސްމާޢީލް ވަނީ ފާޑު ވިދާޅުވެފައެވެ. 

ފާޑު ވިދާޅުވެ "އެކްސް" ގައި ކުރެއްވި ޕޯސްޓެއްގައި އޭނާ ވިދާޅުވީ އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ވަރަށް ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ޚިލާފަށް ކަމުގައެވެ.

މިއަދު ސަރުކާރުން ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން އިއުލާނު ކުރީ އެއްވެސް މަޝްވަރާ ކުރުމެއް ނެތި، ރައްޔިތުންގެ ހިޔާލު ހޯދުމެއް ނެތި ކަމަށާއި ގައުމީ ތަރައްގީގެ 20 އަހަރުގެ މާސްޓާޕްލޭން ވެސް އެކުލަވާލާނީ އެހެންކަމާއި އެ ޕްލޭނާ އެއްގޮތަށް ކަންކަން ވެސް ނުކުރައްވާނެކަން ދިވެހި ރައްޔިތުންނަށް މިއަދު ޔަގީންވާ ކަމަށް އެ ޕޯސްޓުގައި ވެއެވެ. އެއާއެކު ހުއްޓުމެއް ނެތި ހައްދަވަނީ ހުސް ދޮގުކަމަށްވެސް ފައްޔާރު ވަނީ ވިދާޅުވެފައެވެ. 

މިކަމާ ގުޅިގެން އެޕާޓީގެ ރައީސް ޢަބްދުﷲ ޝާހިދު ކުރެއްވި ޕޯސްޓެއްގައި ވަނީ އަރބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ ކަމަށެވެ. އަދި މިފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމު ކަމެއް ކަމުގައިދެކޭ ކަމުގައި ޝާހިދު ވިދާޅުވިއެވެ. ޝާހިދު ވިދާޅުވީ އަރބަން ސެންޓަރގެ ގޮތުގައި ރަށްތަކެއް ކަނޑައެޅުމުގެ މަޤްޞަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަންފެށުން ކަމުގައިވެގެން ނުވާނެކަމުގައެެވެ.

އެތައް ޖަލްސާއެއްގައި ވިދާޅުވެ މެނިފެސްޓޯގައި ވަރަށް ސާފުކޮށް ބަޔާންކުރިޔަސް ވެރިކަމަށް ވަޑައިގެން ވަރަށް ގިނަ ކަންކަން ކުރައްވަމުން ގެންދަވަނީ ސީދާ ވިދާޅުވި ގޮތާ އިދިކޮޅަށް، ލިޔެފައިވާ ގޮތާ ހިލާފަށް. މިއަދު ސަރުކާރުން ހަތް ރަށެއް އާބަން ސެންޓަރުގެ ގޮތުގައި ތަރައްގީ ކުރަން… https://t.co/e5kosS545r

— Fayyaz Ismail (@faya_i) November 9, 2024

ރައީސް ވިދާޅުވީ މާލޭ އާބަން ސެންޓަރުގެ އިތުރުން އެންމެ އުތުރުގެ ތިން އަތޮޅު ހިމެނޭހެން ނޮދަން އިންޓަގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްގީ ކުރުން އެއީ ސަރުކާރުގެ ސިޔާސަތެއް ކަމަށެވެ. އަދި އެކަން ކުރީ އެމަނިކުފާނުގެ މެނިފެސްޓޯގައި ކަނޑައަޅާފައިވާ ގޮތަށް ކަމަށްވެސް ރައީސް ވިދާޅުވެފައި ވެއެވެ. 

އާބަން ސެންޓަރުތަކުގެ ގޮތުގައި ކަނޑައަޅާފައިވާ ރަށްތަކަކީ:

• ރ. އުނގޫފާރު
  
• ބ. އޭދަފުށި
  
• ޅ. ނައިފަރު
  
• އދ. މަހިބަދޫ
  
• ފ. ނިލަންދޫ
  
• ދ. ކުޑަހުވަދޫ
  
• ލ. ފޮނަދޫ

ފާހަގަ ކޮށްލެވޭ ކަމަކީ ސަރުކާރުގެ ނިންމުންތަކާއި ސިޔާސަތު ތަކަށް އިދިކޮޅު އެމްޑީޕީން ފާޑު ކިޔަމުންދާކަމެވެ. އެގޮތުން އެންމެ ބޮޑެތި މަޝްރޫޢު ތަކުން ފެށިގެން ކުދި ކަންތައްތަކާ ހަމައަށް އެޕާޓީން ދަނީ ކޮންމެ ކަމަކަށް ހުއްޓުމެއް ނެތި ފާޑުކިޔަމުންނެވެ. އެގޮތުން ބަންކަރިންގެ ޚިދުމަތާއި، ސަރުކާރުން ނެރޭ ބަޔާން ތަކާއި، ވޭޕް މަނާކުރުމާއި ދުންފަތުން ނަގާ ޑިއުޓީ ބޮޑު ކުރުންފަދަ ކަަންކަން ކުއްވެރިކޮށް ބަޔާން ނެރުމާއި އަންނަ އަހަރަށް ލަފާ ކުރާ ބަޖެޓާއި ގުޅޭ ބަޔާންތައް ނެރެފައި ވެއެވެ. 

ސަރުކާރުގެ ފަރާތުން މިކަމަށް ހޫނު ރައްދުތައްވެސް ދަނީ ދެމުންނެވެ. އެގޮތުން ބަޖެޓާއި ގުޅޭ ގޮތުން ނެރެފައިވާ ބަޔާނަށް ރައްދު ދެއްވާ، ބާރަށު ދާއިރާގެ މެމްބަރު އިބްރާހީމް ޝުޖާއު ވިދާޅުވެފައި ވަނީ ބަޖެޓު ހުށައަޅަންވީ ގޮތް ކިޔާދޭން އުޅޭނެ ކަމެއްނެތް ކަމަށާއި އެމްޑީޕީއަކީ މިސްކިތެއް އަޅަން 1 ލައްކަ ރުފިޔާ ބަޖެޓުގަ ޖެހި ބައެއް ކަމުގައެވެ. ކައުންސިލް ތަކުގެ ބަޖެޓު ކުޑަ ނުވާނެ ކަމަށް ރައީސް ޑރ މުޢިއްޒު ވިދާޅުވެފަ ވާނެ ކަމަށާއި އެކަމަކީ ވެސް އެމްޑީޕީން ކުރިކަމަކަށް ހަދަން އުޅޭނެ ކަމެއްނެތް ކަމުގައެވެ. 

ހަމަ އެހެންމެ ލާމަރުކަޒީ ނިޒާމު ކިޔާދޭން އުޅޭނެ ކަމެއްނެތް ކަމަށާއި އެއީ މާލެ ސިޓީ ކައުންސިލްގެ އެކައުންޓު ހުޅުވަން ހުރަސް އެޅި ބައެއް ކަމަށްވެސް ޝުޖާއު ވިދާޅުވެފައި ވެއެވެ.

ގްރާންޓް ފައިސާކޮޅު ހޯދަން އުޅުނު ގޮތް އަހަމެން ހަނދާން އެބަހުރި. އުސްފަސް ގަނޑުވެސް އަތުލިގޮތް ހަނދާންވޭ! ނިޒާމުގެ ވާހަކަ އެމްޑީޕީ އަށް ނުދެއްކޭނެ

ޝުޖާއު ވިދާޅުވިއެވެ.

ބަޖެޓު ހުށައަޅަންވީ ގޮތް އަހަރެމެންނަށް ކިޔާދޭން އުޅޭނެ ކަމެއްނެތް.ތިއީ މިސްކިތެއް އަޅަން 1 ލައްކަ ރުފިޔާ ބަޖެޓުގަ ޖެހި މީހުން.ކައުންސިލް ތަކުގެ ބަޖެޓު ކުޑަ ނުވާނެ ކަމަށް ރައީސް ޑރ @MMuizzu ވަނީ ވިދާޅު ވެފަ.ދެން އެކަމަކީ ވެސް ތިޔަޕާޓީން ކުރިކަމަކަށް ހަދަން އުޅޭނެ ކަމެއްނެތް.1/2 https://t.co/k4FpuLpRoi

— Ibrahim Shujau (@IbrahimShujaau) November 3, 2024