ބަރަހަނާ މަންޒަރުތައް ދައްކާ ޙަފްލާތައް ބޭއްވުމަކީ މުސްލިމުން ކޮށްގެން ވާނެ ކަމެއްނޫން - ޑރ ޝަހީމް

ބަރަހަނާ މަންޒަރުތައް ދައްކާ ޙަފްލާތައް ބޭއްވުމަކީ މުސްލިމުން ކޮށްގެންވާނެ ކަމެއްނޫން ކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އައްޑޫ ސިޓީގައި މިވަގުތު ކުރިއަށްދާ ބޮޑީބިލްޑިންގ މުބާރާތާ ގުޅޭގޮތުން ސޯޝަލް މީޑިއާގައި ކުރެއްވި ޕޯސްޓެއްގައި ޝަހީމް ވިދާޅުވީ ޤައުމުގެ އިޖްތިމާޢީ ކަރާމަތު ނަގަހައްޓައި އިސްލާމީ ސަޤާފަތު ރައްކާތެރިކުރަންޖެހޭ ކަމަށާއި ޤުރުއާން ބާވައިލެއްވުނީ ހިދާޔަތެއްގެ ގޮތުގައި ކަމަށެވެ. 

ކުރިއަށްދާ ބޮޑީބިލްޑިންގ މުބާރާތް ކުއްވެރި ކުރައްވާ އެކަން ހުއްޓާލުމަށް މީހުންގެ މަޤުބޫލުކަން ހޯދާފައިވާ އަލީ ރަމީޒްވެސް ވަނީ ގޮވާލައްވާފައެވެ. އަލީ ކުރި ޕޯސްޓެއްގައި ވަނީ  އައްޑޫ ސިޓީގައި ބޮޑީބިލްޑިންގގެ ނަމުގައި އަންހެނުންނާއި ފިރިހެނުން އޮރިޔާމުން ސްޓޭޖް މަތީގައި ދައްކަމުންދާ މަންޒަރުތަކަކީ އިންތިހާއަށް ކުށްވެރިކުރާ ކަމެއް ކަމަށެވެ. އަދި މި ހަރަކާތްތައް ހަމަ މިހާރުން މިހާރަށް ހުއްޓުވުމަށް ސަރުކާރަށް ގޮވާލައްވާފައިވެއެވެ.މީގެ އިތުރުން، މި ލާދީނީ ހަރަކާތް ރާވައި ހިންގާ ފަރާތްތަކާ މެދު ހަރުކަށި ފިޔަވަޅު އެޅުމަށްވެސް އަލީ ރަމީޒް ވަނީ އެދިވަޑައިގެންފައެވެ. 

މީގެ އިތުރުން ދީނީ ޢިލްމުވެރިންވެސް މިކަމަށް ފާޑު ވިދާޅުވެ މިކަން ހުއްޓުވުމަށް ގޮވާލައްވާފައިވެއެވެ. މަޝްހޫރު ދީނީ ޢިލްމުވެރިޔާ ޒަމްޒަމް ފާރިޝް ވިދާޅުވެފައި ވަނީ،

 ބޮޑީ ބިލްޑިންގެ ނަމުގައި އޮރިޔާން ޢާންމުކުރަން އެހިންގާ ޖަރީމާ ރަނގަޅު ކުރަނީކީއެއް ނޫނެވެ. ނަމަވެސް ޤަބޫލުކުރަން ޖެހޭ ޙަޤީޤަތަކީ، މިއަދު އެމްޑީޕީ އާއި ޢަދާލަތުން ވެރިކަމުގައި ތިބި ނަމަ، މިހާރު އެކުރިއަށް ގެންދާ ބަރަހަނާ މުބާރާތް ބާއްވާނީ މިހާރު އެތިބި ވަރަށް ވުރެ ވެސް ނިވާކަން ކުޑަކޮށްކަން މިޤައުމުގައި ހޭބުއްދި ހުރި ކޮންމެ މީހަކު ޤަބޫލުކުރެއެވެ. އެންމެ ގާތް ގޮތަކީ، އެއްވެސް އެއްޗެއް ނުލައި ތިބެ މުބާރާތް ބޭއްވުމަށް ނުވަތަ އަލަމްގިރި މުބާރާތެއް އީޖާދުކުރަން އެމްޑީޕީ އިން ވޯޓު ދިނުމެވެ. އެމީހުންގެ ވެރިކަމުގައި ކަން ހިނގީ އެމަގުންނެވެ. 

މިހާރު ކުރިއަށްދާ ބޮޑީ ބިލްޑިން މުބާރާތަކީ އެކި ޤައުމު ތަކުން ބައިވެރިވެގެން ކުރިއަށްގެންދާ ބައިނަލްއަޤުވާމީ މުބާރާތެކެވެ. މި މުބާރާތުގައި އަންހެނުންނާއި ފިރިހެނުން ނިވާކަން ކުޑަ ހެދުމުގައި ހަރަކާތްތެރިވެ ގައިގޯޅިވާ މަންޒަރު ފެނިގެން ދެއެވެ. މިފަދަ އަމަލެއް އާންމުންނަށް ފެންނާނެހާ ބޮޑުކޮށް ކުރިއަށްގެންދާތީ ގިނަ ބަޔަކު ދަނީ އެކަމަށް ފާޑު ކިޔަމުންނެވެ.