އަލިފާނުގެ ހާދިސާގައި ފިހުނު ސްޓެލްކޯގެ މުވައްޒަފު ފަރުވާ ދެމުންދަނިކޮށް ނިޔާވެއްޖެ

ހުޅުމާލޭގެ އިންޖީނުގޭގައި ހިނގި އަލިފާނުގެ ހާދިސާގައި ފިހުނު ސްޓެލްކޯގެ މުވައްޒަފު ފަރުވާދެމުން ދަނިކޮށް ނިޔާވެއްޖެއެވެ.

މިދިޔަ މަހުގެ 26 ވަނަ ދުވަހު ހިނގި ހާދިސާގައި އަނިޔާވި ސްޓެލްކޯގައި ސުޕަވައިޒަރެއްގެ ގޮތުގައި މަސައްކަތް ކުރަމުން އައި އުމުރުން 43 އަހަރުގެ އަހުމަދު އަޒްމީލް ނިޔާވީ ބެންކޮކް ހޮސްޕިޓަލްގައި ފަރުވާދެމުންދަނިކޮށެވެ. އަޒްމީލް ބެންކޮކް ހޮސްޕިޓަލަށް ބަދަލުކުރީ މިމަހުގެ 1 ވަނަ ދުވަހުއެވެ. ހުޅުމާލެ ބައު އިންޖީނުގޭގައި ހިނގި އަލިފާނުގެ ހާދިސާގައި އަޒްމީލްގެ ހަށިގަނޑުގެ އެކި ތަންތަން ވަނީ ވަރަށް ބޮޑަށް ފިހިފައެވެ. އޭނާއަށް ފުރަތަމަ ފަރުވާދިނީ ހުޅުމާލޭ ހޮސްޕިޓަލުގައެވެ.

އަޒްމީލް ނިޔާވުމާއި ގުޅިގެން ސްޓެލްކޯއިން ވަނީ ތަޢުޒިޔާ ކިޔާފައެވެ. ސްޓެލްކޯގެ ތަޢުޒިޔާ މެސެޖުގައި ވަނީ އެ ކުންފުންޏަށް 21 އަހަރު ޚިދުމަތްކޮށްދިން އަޒްމީލް ނިޔާވުމާއި ގުޅިގެން ކުންފުނީގެ ވެރިންނާއި ބޯޑު މެމްބަރުންނާއި މުވައްޒަފުންގެ ނަމުގައި ތަޢުޒިޔާ ކިޔާ ކަމަށެވެ. އަދި މައްޔިތާއަށް ސުވަރުގޭގެ ދާއިމީ ނިއުމަށް ދެއްވުމަށް އެދި ދުޢާކޮށްފައިވެއެވެ. 

إِنَّا لِلّهِ وَإِنَّـا إِلَيْهِ رَاجِعُونَ. pic.twitter.com/oLlYmJKNus

— STELCO (@STELCOMALDIVES) December 11, 2025

އަޒްމީލް އަކީ ސްޓެލްކޯއަށް 21 އަހަރަށްވުރެ ގިނަ ދުވަހު ޚިދުމަތްކޮށް، އެކުންފުނީގެ ސުޕަވައިޒަރު މަޤާމު ފުރުއްވަމުން ގެންދެވި ފަރާތެކެވެ.