ހުޅުމާލޭ އިންޑަސްޓްރިއަލް ޒޯން ސާފުކުރުމުގެ މަސައްކަތް އެޗްޑީސީން ފަށައިފި

ހުޅުމާލޭ އިންޑަސްޓްރިއަލް ޒޯން ސަރަހައްދުގައި ޕާކު ކޮށްފައިވާ އުޅަނދުތަކާއި ދުވާރުމަތީ ބަހައްޓާފައިވާ ތަކެތި ނަގައި އެސަރަޙައްދު ސާފުކުރުމުގެ މަސައްކަތް ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީ)ން ފަށައިފިއެވެ.

އެޗްޑީސީން ބުނީ ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރަމުންދާ މަސައްކަތުގެ ތެރެއިން އިންޑަސްޓްރިއަލް ޒޯނު ސާފުކުރުމުގެ މަސައްކަތް މިއަދު ފަށާފައިވާކަމަށެވެ. މީގެ ކުރިން އެ ސަރަޙައްދުގައި ހުރި އުޅަނދުތައް ބުރާސްފަތި ދުވަހުގެ 11 ޖެހުމުގެ ކުރިން ނެގުމަށް ފުލުހުން ވަނީ އަންގާފައެވެ. އަދި އެގޮތަށް އަމަލުނުކޮށްފިނަމަ އެ އުޅަނދުތައް ޓޯ ކުރާނެ ކަމަށްވެސް ފުލުހުން ބުނެފައިވެ އެވެ.

ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރަމުންދާ މަސައްކަތުގެ ތެރެއިން އިންޑަސްޓްރިއަލް ޒޯނު ހިމެނޭ ސަރަހައްދުގައި ޕާކު ކޮށްފައިވާ އުޅަނދުތަކާއި ދުވާރުމަތީ ބަހައްޓާފައިވާ ތަކެތި ނަގައި އެސަރަހައްދު ސާފުކުރުމުގެ މަސައްކަތް، ކަމާބެހޭ އިދާރާތަކާއި ގުޅިގެން އެޗްޑީސީއިން ދަނީ… pic.twitter.com/9SmrzXYBBx

— Housing Development Corporation (@hdcmaldives) August 31, 2024

ހުޅުމާލެ އަކީ ސާފުތާހިރު އަދި ރައްކާތެރި ތަނަކަށް ހެދުމަށް އެޗްޑީސީން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ދާދި ފަހުން ހުޅުމާލޭ މަގުތަކުގެ ދުވާރުތައް މަތީގައި މޭޒުތައް ބަހައްޓައިގެން ދެމުން އައި ކެފޭތަކުގެ ހިދުުމަތްތައް އެޗްޑީސީން ވަނީ ހުއްޓުވާފަައެވެ. އެއާއެކު ފޭސް2 ގެ ބީޗް ސަރަޙައްދުގައި ގޮޅި ހަދައިގެން ގާޑިޔާގެ ވިޔަފާރިތައްވެސް ވަނީ ހުއްޓުވާފައެވެ. މިހާރު ވަނީ ރީތި ފެންވަރު ރަނގަޅު ހަޓްތަކެއް ޤާއިމްކޮށް ވިޔަފާރިއަށް ކުރިމަތިލުމުގެ ފުރުސަތު ފޭސް2ގައި ދިރިއުޅޭ މީހުންނަށް ހުޅުވާލާފައެވެ.