ޚަބަރު
ޖުމްހޫރިއްޔަތެއްގައި ރައްޔިތުންނަށް ލިބޭ ޙަޤީޤީ ފައިދާ ބިނާ ވެގެން ދާނީ ވެރީންގެ އިޚްލާޞްތެރިކަމުގެ މައްޗަށް - ވަޒީރު އާދަމް ނަޞީރު
ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް- ފޮޓޯ: ދިވެހި ބަހާއި ސަގާފަތާއި ތަރިކައާ ބެހޭ ވުޒާރާ
ފަރުދުން
11 ނޮވެމްބަރު 2024، 02:37
11 ނޮވެމްބަރު 2024، 02:37
ޖުމްހޫރިއްޔަތެއްގައި ރައްޔިތުންނަށް ލިބޭ ޙަޤީޤީ ފައިދާ ބިނާ ވެގެން ދާނީ ވެރީންގެ އިޚްލާޞްތެރިކަމުގެ މައްޗަށްކަމަށް ދިވެހި ބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ބޭއްވި ރަސްމީ ޖަލްސާގައި ވާހަކަ ދައްކަވަމުން ވަޒީރު ވިދާޅުވީ އަދުގެ ރައީސުލްޖުމްހޫރިއްޔާ ޑރ. މުޢިއްޒުގެ ހިތްޕުޅުގައި އޮތް ލޯބި މި ޤައުމަށް ހުށަހެޅުއްވީ ސާފުކަމާއި އިޚްލާޞްތެރިކަމާ އެކުގައި ކަމުގައްޔާއި، އެ އިޚްލާޞްތެރިކަން ދިވެހި ރައްޔިތުން ޤަބޫލު ކުރި ކަމުގައެވެ. އެއާއެކު ވިހި ވަނަ ޤަރުނުގެ ދިވެހީން ދުށް ހުވަފެން ޙަޤީޤަތަކަށް ހައްދަވައިދެއްވީ އަދުގެ ރައީސް ޑރ. މުޙައްމަދު މުޢިއްޒު މިސަރުކާރާ އެކު ކަމުގައިވެސް އެމަނިކުފާނު ވިދާޅުވިއެވެ.
ވަޒީރުގެ ވާހަކަފުޅުގައި އިތުރަށް ވިދާޅުވީ، އަދި މި ހުވަފެން ޙަޤީޤަތަކަށް ހެއްދެވުމުގެ ޢަމަލީ މަސައްކަތްވެސް ރައީސް ވަނީ ފަށްޓަވާފައި ކަމުގައެވެ. އެގޮތުން 20 އަހަރު ދުވަހުގެ ސްޓްރެޓީޖިކް މާސްޓަރ ޕްލޭނަށް އަލިއަޅުއްވައިލައްވައިފައިވެއެވެ. އަދި މަސައްކަތަށް ރައްޔިތުންގެ ޚިޔާލާއި މަޝްވަރާ ދެއްވުމަށް އެދިވަޑައިގަންނަވާ ކަމުގައި ވެސް ވަޒީރު ވަނީ ވިދާޅުވެފައެވެ.
ޖުމްހޫރީ ދުވަހާ ގުޅިގެން ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ވަނީ ބައިވެރިވެ ވަޑައިގެންފައެވެ. މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނު މީގެ އެއް އަހަރު ކުރީން ވެރިކަމުގެ ހުވައި ކުރެއްވި ދުވަހު ވެވަޑައިގެންނެވި ވަޢުދުފުޅާއި އެއްގޮތަށް ރައްޔިތުން ޙަވާލުކުރެއްވި ޒިންމާއާއި މަސްއޫލިއްޔަތު އަދާކުރެއްވުމުގައި ސާބިތުވެވަޑައިގެން ހުންނެވި ކަމަށެވެ. އަދި އެމަނިކުފާނު ވެރިކަން ކުރެއްވުމުގައި ދެމިހުންނަވާނީ "ރައްޔިތުންގެ ފަޅީގައި" ކަމުގައި ވިދާޅުވިއެވެ.
