އިސްލާމީ މަރުކަޒަކީ ޖީލެއްގެ ތަރުބިޔަތުގެ ރަމްޒު، ރައީސް މައުމޫނަށް ޙައްޤު ޝުކުރު އަދާކުރަން- ޑރ ޝަހީމް

އިސްލާމީ މަރުކަޒަކީ ޖީލެއްގެ ތަރުބިޔަތުގެ ރަމްޒު، ރައީސް މައުމޫނަށް ޙައްޤު ޝުކުރު އަދާކުރާކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

އިސްލާމީ މަރުކަޒަށް 40 އަހަރު ފުރުމުގެ މުނާސަބަތާއި ގުޅިގެން ސޯޝަލްމީޑިއާގައި ކުރެއްވި ޕޯސްޓެއްގައި ޝަހީމް ވިދާޅުވީ ރާއްޖޭގެ ރައްޔިތުން ލޯބިވާ އިސްލާމީ މަރުކަޒަށް 40 އަހަރު ފުރުމުގެ މުނާސަބުގައި ރައީސް މައުމޫނަށް ޙައްޤު ޝުކުރު އަދާކުރައްވާ ކަމުގައެވެ. އެއީ ޖީލެއްގެ ތަރުބިޔަތުގެ ރަމްޒެއް ކަމަށާއި، ރާއްޖޭގެ އިސްލާމީ ޤައުމީ ޝަޚްޞިއްޔަތުގެ ނިޝާނެއް ކަމަށާއި އަދި އިސްލާމީ ތަރުބިޔަތާއި ތަޢުލީމާއި ތަމްރީނުގެ ކިއްލާ ކަމުގައިވެސް އެމަނިކުފާނު ވިދާޅުވެފައި ވެއެވެ. 

ވަޒީރު ވިދާޅުވީ ރޯދަ މަސް އިޙުޔާކުރުމުގެ ޖަލްސާތަކާއި ޤައުމީ ޤުރުއާން މުބާރަތާއި އިމާމުން ތަމްރީނު ކުރުމާއި، ޤައުމީ، ބައިނަލްއަޤުވާމީ އިސްލާމީ ކޮންފަރެންސްތަކާއި ޖަލްސާތަށް ހުއްޓުމެއްނެތި 40 އަހަރުގެ މުއްދަތަށް އެ ބިނާގެ ތެރޭގައި ހިނގަމުން އައި ބިނާއަކީ އިސްލާމީ މަރުކަޒު ކަމުގައެވެ.

ްއެއާއެކު އިސްލާމީ މަރުކަޒަށް 40 އަހަރު ފުރުމާ ގުޅިގެން ޚާއްޞަ ޖަލްސާއެއް ބޭއްވުމަށް ރައީސް ޑރ މުޢިއްޒު އިރުޝާދު ދެއްވާފައިވާ ކަމަށާއި، މަރުކަޒުގެ ކަންކަމަށް ރައީސް ޚާއްޞަ ސަމާލު ކަމެއް ދެއްވާކަން ޝަހީމް ފާހަގަ ކުރެއްވިއެވެ. ޝަހީމް ވިދާޅުވީ މަރުކަޒުގެ ފުރިހަމަ މަރާމާތެއް އަންނަ އަހަރު ކުރާނެކަމަށާއި ރައްކާތެރިކަމާއެކު މަރުކަޒު ބަލަހައްޓާނެކަމުގެ ޔަޤީންކަން އަރުއްވާ ކަމަށެވެ. 

އިސްލާމީ މަރުކަޒަކީ 11 ނޮވެމްބަރު  1984 ގައި ހުޅުވިގެންދިޔަ އެންމެ ބޮޑު އިސްލާމީ ބިނާއެވެ. މީގެ 40 އަހަރު ކުރިން ބިނާކޮށްފައިވާ މި ބިނާއަކީ މިހާރުވެސް ދިވެހި ރައްޔިތުންގެ މެދުގައި އެންމެ މަޤުބޫލު ބިނާއެވެ. މަސްޖިދިލް ސުލްޠާން މުޙައްމަދު ތަކުރުފާނުލް އަޢުޡަމް އަކީ އިސްލާމީ މަރުކަޒުގައި ހުންނަ ރީތި ހިތްގައިމު މިސްކިތުގެ ނަމެވެ. އެ ނަން ލިޔުއްވާފައި ވަނީ ރައީސް، އަލްއުސްތާޛު މައުމޫން ޢަބްދުލް ޤައްޔޫގެ އަތްޕުޅުންނެވެ.އެ މަނިކުފާނުގެ ފަންނުވެރިކަމުގެ އިތުރުން އެ މަނިކުފާނުގެ ޝަޚްޞިއްޔަތު ވެސް އެ ނަންބޯޑާއެކު ހާމަވެގެންދެއެވެ.