މިނިވަން މުވައްސަސާ ތަކުގެ ބައެއް މެންބަރުން ވަކިކުރުމުގެ މައްސަލަ ކޮމިޓީއަށް

މިނިވަން މުވައްސަސާ ތައް ކަމަށްވާ، އެންޓި-ކޮރަޕްޝަން ކޮމިޝަން، އިލެކްޝަންސް ކޮމިޝަން އަދި ސިވިލް ސަރވިސް ކޮމިޝަނުގެ ބައެއް މެންބަރުން މަޤާމުން ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް ފޮނުވައިފިއެވެ. 

މަޖިލީހުގެ މިއަދުގެ ޖަލްސާއަށް މަޤާމުން ވަކިކުރުމަށް ފޮނުވާފައިވަނީ ސީއެސްސީގެ ރައީސް މުޙައްމަދު ނާސިހު، އޭސީސީގެ ނައިބު ރައީސް ޢަބްދުއްސަލާމް އަދި އެ ކޮމިޝަނުގެ އެހެން މެންބަރެއްގެ އިތުރުން، އީސީގެ ނައިބު ރައީސް އަލީ ނަޝާތާއި އިތުރު ދެ މެންބަރެކެވެ. މެމްބަރުން ވަކިކުރުމަށް ހުށަހަޅާފައިވާ ސަބަބުތަކެއް ކަމުގައި ސިޓީގައި ބަޔާން ކޮށްފައިވަނީ  ޤާނޫނާ ޚިލާފުވެފައިވާތީ އާއި ޤާނޫނުގައި ބަޔާންކޮށްފައިވާ ސުލޫކީ މިންގަނޑާ ޚިލާފަށް އަމަލުކޮށްފައިވާކަމަށެވެ. މީގެ އިތުރުން ސިވިލް ސަރވިސް ކޮމިޝަނުން ވަކި ކުރުމަށް ނިންމާފައިވާ ކޮމިޝަނުގެ ރައީސް މުޙަައްމަދު ނާޞިހު ވަކިކުރުމަށް ނިންމާފައިވަނީ ކޮމިޝަނުގެ މަސްއޫލިއްޔަތުތަކާ ޚިލާފަށް މަސައްކަތް ކޮށްފައިވާތީކަމަށް މިނިވަން މުއައްސަސާތަކުގެ ކޮމިޓީން ވަނީ ބުނެފައެވެ. 

މިނިވަން މުއައްސަސާތަކުގެ ތެރެއިން އޭސީސީއާއި އީސީގެ ރައީސުން އައްޔަންކުރުމުގެ ބާރު ރައީސުލްޖުމްހޫރިއްޔާ އަށް ލިބިދެވޭ ގޮތަށް ޤާނޫނަށް ބަދަލުގެންނަން ސަރުކާރުގެ ފަރާތުން ރައްޔިތުންގެ މަޖިލީހަށް ވަނީ ބިލެއް ހުށަހަޅައިފައެވެ. މި ދެ ބިލު ބަލައިގަނެ، އެ ބިލުގެ މަސައްކަތް މިހާރު ކުރިއަށް އެބަދެއެވެ.