ޕާސަނަލް ޑޭޓާ ޕްރޮޓެކްޝަން ބިލް އަދި ސައިބަރސެކިއުރިޓީ ބިލަށް ޚިޔާލު ހޯދުމަށް މަޝްވަރާ ބައްދަލުވުމެއް ބާއްވައިފި

ޕަރސަނަލް ޑޭޓާ ޕްރޮޓެކްޝަންގެ ބިލާއި, ނޭޝަނަލް ސައިބަރ ސެކިއުރީޓީގެ ބިލާއި ބެހޭގޮތުން ސަރުކާރާއި، މާލީ އަދި ޓެލެކޮމް ދާއިރާގެ ވިޔާފާރިތަކާއި އަދި އަމިއްލަ ޖަމާއަތްތައް ހިމެނޭގޮތުން ޚިޔާލު ހޯދުމުގެ މަސައްކަތު ބައްދަލުވުމެއް ބާއްވައިފިއެވެ.

މިމަހުގެ 6-7 ގައި ކުރިއަށްދިޔަ މި މަސައްކަތު ބައްދަލުވުން އިންތިޒާމުކޮށްފައިވަނީ ވޯލްޑްބޭންކްގެ ހިލޭ އެހީގެ ދަށުން ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ކުރިއަށްގެންދާ މަޝްރޫޢުއެއްކަމުގައިވާ ޑިޖިޓަލް މޯލްޑިވްސް ފޮރ އެޑަޕްޓޭޝަން، ޑީސެންޓްރަލައިޒޭޝަން އެންޑް ޑައިވަރސިފިކޭޝަން (ޑީމެޑް) ޕްރޮޖެކްޓްގެ ދަށުންނެވެ. 

މިބައްދަލުވުމުގެ ސެޝަން ތަކުގައި ޕަރސަނަލް ޑޭޓާ ޕްރޮޓެކްޝަން ބިލާއި ބެހޭގޮތުން މަޝްވަރާކޮށްފައިވެއެވެ. މި ބިލުގެ މަޤްޞަދަކީ، ފަރުދުންގެ ޒާތީ މަޢުލޫމާތު ބަލަހައްޓާ ފަރާތްތަކުން ޒާތީ މަޢުލޫމާތު އެއްކުރުމާއި، ބޭނުންކުރުމާއި، ހާމަކުރުމުގައި މައުލޫމާތުގެ ރައްކާތެރިކަން ކަށަވަރުކުރުމަށްޓަކައި އެފަދަ މައުލޫމާތަކީ ކޮބައިކަން ސާފުކޮށް ބަޔާންކޮށް، އެފަދަ މައުލޫމާތު ބޭނުންކުރުމާއި ހާމަކުރުމުގެ ކަންކަން ބެލެހެއްޓުމުގެ މިންގަނޑުތަކާއި ޒިންމާތައް ކަނޑައެޅުމެވެ. 

މި ބައްދަލުވުމުގައި 39 މުވައްސަސާއަކުން 69 އޮފިޝަލުން ބައިވެރިވެފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ބުނެފައިވެއެވެ. މީގެ ތެރޭގައި ޑޭޓާ ޕްރޮސެސްކޮށް ބަލަހައްޓާ ސަރުކާރުގެ އިދާރާތަކާއި، ޤާނޫނު ތަންފީޒުކުރާ ޚިދުމަތްތަކާއި، ބޭންކިން ދާއިރާ، ޓެލެކޮމްދާއިރާގެ ވިޔަފާރިތަކުންނާއި ސިއްޚީ ދާއިރާ އަދި ފަތުރުވެރިކަމާއި އަދި ފަންނީޔަތާއި ގުޅުންހުރި އަމިއްލަ ޖަމިއްޔާތަކުން ބައިވެރިވިއެވެ.

މީގެ އިތުރުން ނޭޝަނަލް ސައިބަރ ސެކިއުރިޓީގެ ބިލު ބައިވެރިންނަށް ހުށަހެޅުމާއި ސުވާލުތަކަށް ޖަވާބު ދިނުންވެސް ވޯކްޝޮޕްގައި ކުރިއަށް ގެންގޮސްފައިވެއެވެ. މިދުވަހުގެ ބައްދަލުވުމުގައި 32 މުވައްސަސާއަކުން 60 އޮފިޝަލުން ބައިވެރިވެފައިވާ ކަމަށް އެ ވުޒާރާއިން މަޢުލޫމާތު ދެއެވެ. މި ސެޝަންގައި ބިލް ހުށަހަޅައިދެއްވީ ސަރުކާރުން އަލަށް ޤާއިމްކޮށްފައިވާ ނޭޝަނަލް ސައިބަރ ސެކިއުރިޓީ އޭޖެންސީގެ ޗީފް އެގްޒެކެޓިވް އޮފިސަރ ޑރ. އަޙްމަދު ނައުފަލް އަބްދުލްހާދީއެވެ. 

ސަރުކާރުގެ މައިގަނޑު އަމާޒަކީ މި ބިލްތައް ތަރުޖަމާކޮށް އަދި ރައްޔިތުންގެ މަޖިލިހަށް ހުށަހެޅުމެވެ. ދިވެހިރާއްޖޭގެ ތަރައްޤީއަށްޓަކައި ޑިޖިޓަލް ޓެކްނޯލޮޖީ މެދުވެރިކޮށް ކުރެވެންހުރި މުހިންމު ކަންކަމުގައި ޑީމެޑް ޕްރޮޖެކްޓިންދަނީ އެހީތެރިކަން ފޯރުކޮށްދެމުންނެވެ. މިގޮތުން ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީއާއި ކޮމިއުނިކޭޝަން އޮތޯރިޓީ އޮފް މޯލްޑިވްސްގެ ފަންނީ ޤާބިލްކަން އިތުރުކުރުމާއި ޑިޖިޓަލް ޚިދުމަތްތައް ތަރައްޤީކުރުމަށް ޑީމެޑް ޕްރޮޖެކްޓްއިން އެހީތެރިކަން ފޯރުކޮށްދެއެވެ.